Shwa u Snem Thymmai ki paidbah kin sa ïohi ïa ka surok heh ba thymmai na Umshyrpi – Pomlum

Shillong, Nohprah 01 : U Symbud Myntri Rangbah ka Jylla ba peit ïa ka tnad PWD, Bah Prestone Tynsong ha ka sngi Nyngkong u la hiar dalade hi ban jurip ïa ka jingpyntrei ïa ka surok fourlane naduh Umshyrpi ter ter haduh Pomlum kaba hap ha ka Package 1.
Ha kane ka jingjurip, ka kompeni ba pyntrei ïa kane ka projek ka la pyntikna biang hakhmat u Symbud Myntri Rangbah ba ïa kane ka bynta ba nyngkong kin pyndep beit mynta u Nohprah hi.
“Na ka liang u contractor jong ka package -1 u la kular ba ïa kane ka surok yn pyndep hapoh ka 31tarik jong u Nohprah. Haoid ka jingpyndep pura lut kan shim por kumba 15 -20 sngi ei ei hynrei kata kam lei lei. Kaba nga kwah ka long ba ki paidbah kin ïohi ba ka jylla jongngi kan ïaid shaphrang khamtam kane ka fourlane kaba la angnud da ki phew snem mynta kan sa urlong noh naduh Umshyrpi haduh Pomlum kan dep nadong shadong hapoh ka 31tarik Nohprah,” u la bynrap biang.
Shwa kane, u Bah Prestone u la ïathuh ba ki don bun ki daw kiba pynsuki ïa kane ka projek kynthup naduh ki kam ba tyngkhuh bad ka bording, bad ka um ba hap ban pynkynriah ïa ki pipe, ïa ki post elektrik. “Ka jingtyngkhuh ha kane ka package-1 ka long ba ki pipe ba hap pynkynriah ki dei kiba heh suda bad kam dei satia kaba suk ban pynkynriah. Dei na kata ka daw kumba ka jia ha 101 area ba kin sdang ban pynïaid ïa ki pipe um jong ka PHE kiba sah sa kumba 170 mitar.”
Nangta u la ïathuh ba haba ïadei pat bad ki post elektrik ki la ïoh ïa ka jingkular ban pyndep noh ha ka por kaba biang mynta u bnai.
Ha kane ka jingjurip la donlang ruh naduh ki ophisar jong ka tnad PWD, PHE, ka Deputy Commissioner ka East Khasi Hills, ki nongmihkhmat na ka NHIDCL, ki heh ka kompeni bad kiwei kiwei.