Shwa ka ‘Personal Interview’, dei ban pynbeit shwa kyrpad ki lai seng ka SSSS, HYC bad HITO ïa u DC

Mawkyrwat, ‘Naitung 10: Ki lai tylli ki kynhun, kiba kynthup ïa ka Synjuk ki Seng Samla Shnong (SSSS), ka Hynñiewtrep Youth Council (HYC) bad ka Hynñiewtrep Integrated Territorial Organisation (HITO) kiba dei jong ka South West Khasi Hills District, Mawkyrwat, ki la leit ban ïa kynduh ïa u Deput Commissioner, South West Khasi Hills District ban don ka jingpynbeit ia ki katto katne ki bynta, shwa ban khot pynlong ïa ki Personal Interview.
Ha ka shithi ba ki lai seng ki la phah ha u Deputy Commissioner jong ka South West Khasi Hills District ki la ong ba shwa ka Personal Interview dei ban don ka jingpynbeit bad pynpaw kata ka long ba ka kyrteng bad Roll Number jong ki nongaplai ne nongthep kam, ba na ka daw jong ka jingshimpor slem ban pynmih ïa ka result lyngba ka District Selection Committee (DSC), kiba bun ki samla wad kam ki la hap wad biang ïa ki Admit Card, don pat na ki kiba la kum pynjah bad don ruh kiba la kum klet.
Namarkata, ki lai seng ki buh ka jingkyrpad ïa ka ophis ba sngewbha haba pynmih ïa ka resol dei ban ai lang ïa ki kyrteng bad Roll Numbers ïa baroh ki posts, kumba la leh ïa ka result jong post LDA kaba dei ha ka 4 tarik u ‘Naitung, 2024.
Shuh shuh la ong ba katkum ka jingïohlum jingtip, ki don kiei kiei kiba pynsuba sniew bad pyn-artatien ïa ki samla wad kam halor ka rukom pynmih ïa ki resol jong ka District Selection Committee (DSC) kab dei mynta u snem 2024. Kumta sa shisien ki ban biang ba na ka liang ka ophis kan sngewbha ban pynmih lang ïa ki kyrteng bad ki Roll Numbers, khnang ba ki samla wad kam kin shai kdar, halor kane ka resol District Selection Committee (DSC).
Ha kaba ïa dei bad ka Reservation Roster, ki lai seng ki pynpaw ba halor kane ka mat, ki kwah ban ïoh jingshai halor ka jingpyntreikam ïa ka, ha kaba ïadei bad ki eksam bapher bapher lyngba ka District Selection Committee (DSC), South West Khasi Hills District, Mawkyrwat.
Ym tang kata ha kaba ïa dei bad ka Personal Interview pat na ka liang ka SSSS, HYC bad HITO ki kwah ban ïoh jingshai, kaei ka jingeh ïa ka District Selection Committee (DSC) ban buh da ki CCTV Camera ha ka Personal Interview, bad hato ka long ne em ba ka District Selection Committee (DSC), South West Khasi Hills District, Mawkyrwat kan buh CCTV Camera, na ka bynta ka jingbha jong ki samla nong wad kam.
Kumta halor kitei ki mat ba donkam bad ba kham kyrkieh, ki kyrpad ïa ka ophis ba ka dei ban pynbeit ryntieh ïa ki mat treikam, na ka bynta ka jingbhalang jong ki samla wad kam baroh, bad ka bit ka biang jong ka imlang sahlang.
Ïa ka kynhun ha kane ka sngi la lamkhmat da u bah Wallam Syiemïong, Chairman jong ka Synjuk ki Seng Samla Shnong (SSSS), South West Khasi Hills District, Mawkyrwat, u Wallam Nongsiej, President jong ka ka Hynñiewtrep Youth Council (HYC), South West Khasi Hills District, Mawkyrwat bad u bah Polius Thyrniang, President jong ka Hynñiewtrep Integrated Territorial Organisation (HITO), South West Khasi Hills District, Mawkyrwat.