Shwa ka National Games 2027 yn pyndep lut ïa ki jaka ïalehkai ha ka jylla

Shillong, Nailur 03: U Myntri ka tnad ïalehkai jong ka Sorkar Meghalaya, u Bah Shakliar Warjri u la pynpaw biang ba ka jylla ka don ha ka lynti ban pdiang bad pynlong ïa ka National Games ha u snem 2027, watla ki don katto katne ki jaka kiba dang don hapdeng ka jingtrei kiba dang ïaid shakhmat.
Haba batai ïa ka jingpynkhreh jong ka jylla ban pdiang ïa kane ka lympung ïalehkai kaba heh tam jong ka ri sha ki lad pathai khubor u Bah Shakliar u la kam ba ki don “katto katne ki bynta kiba dang donkam ban maramot pynbha,” da kaba bynrap ba ka “jingpyntrei ban tei ïa ki jaka ïalehkai ka dang ïaid shakhmat ryngkat bad ki sienjam kiba la dep ban shim. U la pynskhem ruh ba ka Meghalaya kan sa lah ban pynbit pynbiang lut ïa baroh ki jingduna ha kaba ïadei bad ki jaka ïalehkai shuwa ba kan pdiang ïa kane ka lympung ha u snem 2027.
“Ka jingpynkhreh ïa ka National Games ngi la ïaid shait shait ha kaba ïadei bad ki jingtei ïa ki madan. Ho-oid watla kam long 100 na ka 100 (ïa mynta), hynrei haduh u snem 2027 ïa kaba ngin poi ban pynlong ïa ka National Games ngi ngeit skhem ba ka Sorkar ka lah ban pynbit pynbiang lut ïa baroh,” la ong u Bah Shakliar.
U Bah Shakliar u la kren ruh shaphang ka jingïalang jong ki Myntri ka tnad ïalehkai ki jylla ka thaiñ shatei lammihngi kaba dang shen, ha kaba la ïoh ban ïakren ïa ka jingmut ban ai bynta lang ïa baroh ki jylla NorthEast. Ka jingmut ka long ban ai bynta lang kawei ka jait jingïalehkai (discipline) sha kawei pa kawei ka jylla (NorthEast) khnang ba ka jingkitkhlieh ban pynlong bad pynphriang ïa ki jingïalehkai yn lah ban ïasam ha kylleng ka thaiñ.
Hynrei ha kaba ïadei bad kane u Bah Shakliar u la pynshai ba “ka rai kaba khatduh halor ka jingai bynta ïa ki jait jingïalehkai ka dang sah namar ba ki jingïakren ki dang ïaid shakhmat, bad ïa ka jingpynbna kaba bñiah yn sa ai tang ynda la dep pyndep lut ïa kiei kiei baroh.”
Halor ka jingpynkhreh hapoh ka jylla, u Bah Shakliar u la kdew ba ka sorkar ka la dep ban pyllait ïa ka pisa kum ka jingkyrshan sha ki synjuk ïalehkai bapher bapher. Kane ka long na ka bynta ba kin pyntreikam ban leit sha man ki district bad ban pynlong ïa ki jingpyrshang (Selection trial) ha la ki jong ki jong ki jait jingïalehkai khang ba kin lah ban sei ïa ki nongïalehkai ba kynsai, u la batai.
U la kdew ïa ka Meghalaya Games, kaba la pynlong da kaba jop haduh ar snem lynter, kum ka nuksa jong ka buit pynkhreh kaba kham jylliew jong ka jylla. “Ki katto katne ki sienjam ki dang don ha ka jingthmu, kiba thmu ban pynkhlaiñ ïa ki jingïalehkai ki ban paw ha ka National Games,” u la pynthikna.
Haba kylli hato ka sorkar kan pynleit jingmut ha ki katto katne ki jingïalehkai ba kyrpang, u Bah Shakliar u la pynskhem ba “kan ym long kaba dei ban buh kyrpang ïa kano kano ka jingïalehkai,” watla u la kam ba ka met bad ka jingkhlaiñ jong ka Meghalaya ka lah ban ai ïa ki nongïalehkai ïa ka jingjop ha ki katto katne ki bynta.
Katba ka jingpynkhreh ka dang ïaid shakhmat, u Bah Shakliar u la pynpaw da ka jingsngew skhem ba ka Meghalaya kan wanrah ïa ka National Games kaba jop bad kaba seisoh ha u snem 2027.