Shillong, Nohprah, 11: Ka seng Congress ka la buh thong la kumno kumno ban pynbna noh shwa ka Christmas ïa ka thup banyngkong jong ki kyrtong ki ban aireng ha ka elekshon MDC ha Khasi Hills Autonomous District Council (KHADC) bad ha Jaiñtia Hills Autonomous District Council (JHADC) ka ban sa long.
Ha ka jingïakren bad ki lad pathai khubor u Vice President jong ka Meghalaya Pradesh Congress Committee (MPCC) u Bah Ronnie Lyngdoh u la ïathuh ba ka party kan sa pynbna ïa ki kyrteng lyngba ha ki thup bapher bapher namarba ki don ki Constituency ba ki nongaplai ki don ar ne lai ngut bad ba ka party kan hap ban peit bha.
“Ka rukom treikam jong ka party ka long haba don ar ne lai ngut ki nongaplai tiket ngi phah ïa ki nongpeit pyrman sha ki Block bad lada don tang marwei ba aplai tiket ngi pynbna noh,” la ong u Bah Ronnie.
U la ïathuh ba ïa ki kyrtong ka Congress kan pynieng ha baroh 29 Seat ha KHADC bad ha JHADC.
Haba kylli, u la ïathuh ba ha ki Constituency ba ki lai ngut ki MLA ka party ki la phet noh sha ka NPP ki nongpan tiket ki don haduh ar ngut lai ngut bad na kiwei ki party ruh mynta ki la kwah ban pan tiket na ka Congress.
