Shwa ban kut u snem 2026 yn tei pyndep baroh ki projek ha New Shillong, pyntip u CM

Shillong, Naiwieng, 20: U Myntri Rangbah ka Jylla u Conrad K.Sangma ha ka sngi Balang u la pyntip ba bun na ki projek ba kongsan ba la pyntrei ha New Shillong Township yn sa pyndep pura shwa ban kut u snem 2026.
U Sangma ba la synran lang da u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar ki la leit jngoh ïa ka jaka kaba heh 232 akar ba la mang kyrpang ban shna ïa ka building jong ka New Shillong Administrative City, ha kaba yn don ka Administrative Complex kaba heh ryngkat bad ka Secretariat Building bad kiwei kiwei ki tnat treikam Directorate.
“Ngi don hangne sa ban tei ïa ka Secretariat ba thymmai bad ki Directorates ba thymmai jong ka Sorkar Meghalaya ïa kaba yn sa tei. Yn tei ym tang ïa ka Secretariat bad ka Directorate, hynrei ki dang don bun ki projek kiba la ïaid shakhmat ha kane ka jaka la ka long ka IT park phase-1 bad phase-2, ka Utility Mall, ka Integrated Command and Control Centre (ICCC), ka New Skill Park, ka Prime Hub, ïa ka Heliport jong ka Shillong yn sa tei hangne bad bun ki iing mala ruh kin sa mih,” la ïathuh u Sangma hadien ba ladep ka jingjurip.
“Kin sa don bun ki kam kiba yn sa pyntyllun shakhmat bad ngi kwah ba kane ka bynta baroh kawei kan long kaba la saiñdur janai bha. Kan sa long ruh kawei ka nongbah kaba itynnat bad ngi kyrmen bad ngi buh thong da ka jingkyrmen ba ha ki 50-100 snem kane ka jaka kan long kawei na ki jaka treikam ba kyrpang ha ki snem ban sa wan. Dei na kata ka daw, la shna ïa ki surok kiba heh bad kiba kylluid,” u la bynrap.
U Sangma u la pynpaw ruh ka jingsngewkmen ban ïoh ba bun na ki projek ki la ïaid shakhmat kumba la khmihlynti.
“Nga la wan lang ryngkat bad u Symbud Myntri Rangbah bad ki ophisar ban jurip ïa kine ki projek ba la pyntyllun shakhmat bad ngi sngewkmen ban ïohi ba bun na ki, ki la jan dep artat bad don ruh kiba yn sa shna pyndep shwa ban kut u snem 2025. Tad haduh u snem 2026 ngin sa ïohi ba baroh ki projek ba kongsan yn sa shna pyndep lut,” la ïathuh shuh shuh u Sangma.
Da kaba pynpaw ba kane ka jaka ka dei kaba kongsan tam na ka bynta ka jingkiew artet ka Jylla, u Myntri Rangbah u la ong, “ngi sngewkmen ban ïohi ba ki jingtrei ki la ïaid shakhmat kumba la saiñdur bad nga ai khublei kyrpang ïa u Symbud Myntri Rangbah uba khmih ïa ka tnat Pynroi Sor bad ïa ka kynhun baroh kawei jong ka tnat Pynroi Sor kiba la buh thong ban pynurlong ïa kine ki jingthmu.”