“Shwa ban dier ka por, to ngin sumar khuid ïa ki um ki wah” ong ka KSU ha ka jingpynkhuid ïa ki jakhlia ha Wah Umnew

Mawkyrwat, Ïaïong, 30: Kum shibynta ban wanrah ïa ka khuid ka saba ha ki sawdong sawkun bad khamtam eh ha ki um ki wah, ka Khasi Students’ Union (KSU) jong ka South West Khasi Hills District Unit lyngba ka Environment Cell ha ryngkat ka Dorbar Shnong Mawkyrwat, ki Seng Samla Shnong bad ka South West Khasi Hills District Swimming Association (SWKHDSA) lem ruh ka jingïasnohlang jong KSU Mawkyrwat Circle mynta ka sngi ka 30 tarik u Ïaïong, 2022 ki la ïoh ba pynlong ïa ka jingïapynkhuid ïa ka Phot Umnew kaba don ha South West Khasi Hills District.
Ka jingthmu jong kane ka program ka long ba lada peit ïa kane ka wah kam pat da donkam eh ban pynkhuid namar ka dang ha ka ïa ka jingkhuid jingsuba, hynrei shwa ba ka por kan dier bad ba kan long ruh ka jinghikai na ka bynta ki paidbah jong ka dong ka thaiñ kiba ju pyndonkam ïa kane ka wah ha kiba bun ki bynta. Shuh shuh ka long ruh ha kajuh ka por ba kum ki samla ki kwah ban leh ei ei bad ban pyni ne ban pynpaw ha ka pyrthei ba ka donkam eh mynta ban don ka jingpynkhreh lypa ne ban tyngkai ïa ki um ki wah namar ïoh ba ka por kan poi ba kine ki wah ha ki jaka jong ngi kin long kum ki wah kiba don ha Nongbah Shillong kata ka Wah Umkhrah bad ka Umshyrpi kiba la i sait met ban peit ruh namar ka jingjakhlia jong ki.
Namarkata, kata shwa ban kan jia kine kiei kiei kum ki samla jong ka Khasi Students’ Union (KSU) ki pynlong khnang ïa kane ka program ban pyni ba ka jingkhuid jingsuba ne ban tyngkai ïa ki um ki wah ka long kaba donkam haduh katta katta, namar dei na kane ka wah ba kiba bun tylli ki shnong ki pyndonkam ban ring um ba pyndonkam ban dih ïa ka bad ha kajuh ka por ha kane ka jaka ruh kiba bun ki paidbah na kylleng ki jaka ki ju pyndonkam ruh ban saitjaiñ.
Lyngba kane ka program ba la pynlong da ka KSU ka kyntu ruh na ka bynta ki paidbah na kylleng ki jaka ba haba ki wan ha kane ka wah ban pyndonkam ha kiba ki bynta ki dei ban long kiba husiar bad phikir bha da kaba long borabor kiba lehkhuid da kaba kin nym ai lad ba ka mynsiem kaba biang ïa lade ka don ha ki hynrei haba leh ïa kano kano dei ban da pyrkhat namar ka mynsiem biang tang ïa lade ka long kaba bakla. “Lada ki mih na ïing ryngkat ki jakhlia ba ki thmu ban wan bret ha kane ka wah kata ka long ka bym dei” bad kaba donkam ka long ba haba ki wan saitjaiñ ne wan sum ha kane ka wah ki dei ban buh shi jaka ïa ki jakhlia kum ki plastik, ki jingsop khyllung bad kiwei kiwei khnang ba kan nym pynjakhlia ïa ki um bad ïa ki sawdong sawkun.
Ki nongkren ha kane ka sngi ki la pynpaw ka jingaikhublei na ka bynta ka KSU jong ka South West Khasi Hills District Unit kaba la ïoh ban pynlong ïa kum kane ka prokram kaba long kawei na ki bynta ban ïai hikai na ka bynta ki paidbah jong ki shnong bapher bapher ba ka jingkhuid jingsuba jong ki um ki wah bad ki sawdong sawkun ka long kaba donkam. Ha kajuh ka por ki la ong ruh ba ki ai ka jingkyrshan kaba pura na ka bynta ka KSU kaba la pynlong ïa kane ka prokram ba kim dei ban pynlong tang mynta ka sngi hynrei ai ba kin dang ïa bteng na kawei ka por sha kawei pat khnang ba kan long ka jinghikai ruh ïa ka pateng ka ban wan.
Ki la ong ruh ba lyngba kane, kan long ka jingkyrsiew thiah ruh ïa kiba bun balang kiba ju pyndonkam ïa kane ka Phot-umnew ne wah sala bad ba kin sumar ïa ka jinglong kyrpang jong kane ka wah, namar kane ka wah ka dei u klongsnam ba kiba bun bad ka dei ruh ka wah um kaba im na ka bynta kiba bun ki shnong kiba pyndonkam ban ring um. Namarkata, ki ai ka jingkyntu ïa ki paidbah ba kim dei ban leh tohmet hynrei ai ka kti kamon ka kti kadiang ban ïatreilang ban wanrah ïa ka khuid ka suba ha kane wah. “Lada kane ka wah kan jakhlia ne kan jaboh, kan sa poi ka por ba ngin sa mad ïa ki jingeh bad hangta ngin sa lynñiar”, ong u President ka Seng Samla Shnong Mawkyrwat, bah Kitborsing Lyngdoh Marshilong.
U Vice President ka South West Khasi Hills District Swimming Association, bah K.L. Lyngdoh u la ong ba kane ka por ka dang dei ka por kaba biang eh ban shim ki lad ki lynti ban ai ka jinghikai ha kiba bun ba ki dei ban sumar khuid ïa ki tyllong um, namar lada ka la long kum ki wah ha ka Umshyrpi bad wah Umkhrah ka la shem shitom ban pynkhuid ïa ki. “Ka kam ka kren khamjam ban ïa ka ktien”, ong u bah Lyngdoh bad ai ba kane ka kyntien kan long ka jingkyrsiew na ka bynta kiwei de ki para samla jong ka dong ka thaiñ ba kim dei ban shu heh nia tang ha ki social media hynrei na ka bynta ka bha miat jong ka dong ka thaiñ ki dei ban ïa mih shakhmat ban trei ne ban ïasnohktilang ban wanrah ïa ka khuid ka suba ym tang ha ki um ki wah, hynrei wanrah ïa ka khuid ka suba ruh ha kiba bun ki bynta jong ka imlang ka sahlang kum ha ka bam ka dih kiba lai phew jait kiba la ktah bha ïa kiba bun ki samla.
U Myntri jong ka Shnong Mawkyrwat, bah R.R. Lyngkhoi u la ong ba ka jingshim jong ka KSU ban pynlong ïa kane ka jingpynkhuid ka long na ka bynta ka jingbha jong ki paidbah ym ka jingmyntoi jong ki. Kumta u la ai ka jingïaroh ba da ka jingshimkhia jong ki khun samla ban trei na ka bynta ka jingbha kane ka wah ruh kan sa long kaba itynnad bad kaba khuid ba suba. Kumta u la pynpaw ba haba ki trei na ka bynta kaba bha, kum ka shnong ruh kan ai ka jingkyrshan ba pura, hynrei lada trei tang ka myntoi ka mala de ne na ka bynta shimet kata kam long kaba dei.
Ha kane ka sngi shwa ban sdang ka jingïapynkhuid la ïoh ban pynlong ka jingïalang ba lyngkot ha kaba u Environmental Secretary, u Plosborlin Kharkahrin u la pynïaid.
Ki nongkren ha kane ka sngi ki long u President ka Seng Samla Shnong Mawkyrwat, bah Kitborsing Lyngdoh Marshilong, u Junior Executive Engineer ka PHE Mawkyrwat Division, bah P. Myrthong, u Vice President ka South West Khasi Hills District Swimming Association, bah K.L. Lyngdoh, u Myntri jong ka Shnong Mawkyrwat, bah R.R. Lyngkhoi.