Nongpoh, Nailur 06 : Kum ka jingpynkhreh ïa ka jingïaseng Synod CE Union ban long ha ka shnong Kbet Nongbri ha u snem 2026, u MLA ka Nongpoh Constituency u Bah Mayralborn Syiem u la leit ban ïakynduh kyrpang ïa ki nongïalam bad ki paidbah nongshong shnong ha ka jingdonlang ruh ki ophisar na ki tnad sorkar ban peit ïa ki jingdonkam bad ki kam pynroi ha katei ka shnong.
Kum u MLA u la shimkhia ruh ban rah ryngkat ki kam pynroi kiba ka shnong kala kyrpad bad khamtam ban mang thymmai bang siang rong ruh katto katne ki bynta ha katei ka shnong shuwa katei ka jingïaseng ban pynsuk ïa ki paidbah ba leit ba wan.
Haba kren ha kane ka sngi u Bah Syiem u la ong ba kum u nongmihkhmat paidbah kiba la jied bad pynjop ïa u ka dei ka kamram jong u ban leit sha ki shnong ban theh ki jingïarap khamtam ka shnong Kbet Nongbri ka ban sa pdiang ïa ka jingïaseng Synod ha u snem ban wan.
U la ong ruh ba ka roi ka par ka dei kaba hakhmat eh bad kumta u la leit ban jngoh ïa katei ka shnong ban ïakynduh bad ban mir jingmut bad ki nongïalam ryngkat ki paidbah nongshong shnong ïa ka jingdonkam ba hakhmat eh ba kum ka shnong ka donkam bad ha katei ka sngi na ka liang u MLA ryngkat ki ophisar kila jurip ruh ïa katei ka shnong naduh ka madan, ki surok ban poi sha katei ka jaka ban pynkhreh lypa shuwa ban pdiang ïa katei ka jingïaseng kaba heh.
U MLA u la aiti ruh ïa ki work order bapher bapher sha katei ka shnong katkum ka jingdonkam jong ki ban nang pynphuh pynphieng bad khamtam ban kyntiew ïa ka roi ka par.
