Shuwa ka elekshon MLA ngim ïoh tang ki kyrtong mynta kiba pan tiket ym sngewthuh sngewthaw shuh: Ardent

Shillong, Jylliew 14: U President ka Voice of the People Party (VPP) u Bah Ardent M Basawïawmoit u la ong ba ka jingïaid lynti ka VPP ha kine ki shisnem tam naduh ba sdang ïa ka la ïaid bun bah ki jingeh kiba lada ïaid tang kum briew hi kin randien hynrei u ong ba dei ka jingïalam lynti u Blei bad ka jingsynran jong u kaba la pynlah ïa ka party bad ïaid kat haduh mynta.
Haba kren ha ka jingïalang pynrung dkhot ha Sohiong, u Bah Ardent u la ong ba ha ka elekshon MLA ba dang shudep ka party hi ka dei kaba shah kheiñ troiñ tam bad ki briew hi kim khmih lynti ba kan jop 4 ngut.
“Ha ka elekhson MLA ba dang shu dep ïa ka VPP ym don mano mano ba kheiñ snem bad kim khmih lynti ruh ba ngin jop 4 ngut bad ba ka jingïoh vote kan long kumto. Pyrkhat wat tang ki kyrtong 20 ngut ban pynïeng ruh ngim ïoh namar ki ong beit ban ïakhun na ka VPP ka long kaba ym lah long bad kaba yn ym lah jop satia namar ngin ïakhun khlem pisa hynrei mynta pat ynda ki ïohi na kaei kaba la jia ha ka elekshon MLA ka jingwan pan tiket MDC kaba ym sngewthuh sngewthaw shuh,” u la ong.
U la ong ba ka jingjop hi ka VPP ha kane ka elekshon ka long ka jingkyrmen ïa ka jaidbynriew bad ïa ka lawei ki pateng namar ka don ki nongrim kiba skhem bad ka thong ïohi jngai kaba shai na bynta ki pateng ban wan.
Haba kren halor ka lekshon MLA ba dang shu dep u Bah ardent u la ong ba ka jingjop ka party UDP kam dei eh namar ki briew ki mon hynrei ka dei beit namar ki kwah ban pynrem kput ïa ka NPP kaba la leh sat ïa ka jylla.
“Jin lada ngi ïoh lad ban pynïeng kyrtong ha kane ka elekshon ba dang shu dep ngam artatien ba ngin ïoh rah na kane ka constitunecy bad ka jingjop u kyrtong na ka UDP ruh kam dei eh ba ki paidbah ki ieid UDP hynrei namar ki kwah ban pynrem ïa ka NPP,” u la ong.
Haba kyrtiang dien sha ka elekshon MLA ha u snem 2018 u Bah Ardent u la ong, “Nga ïakhun ryngkat bad ka party kaba nga don ha kato ka por ban ym ailad ïa ka BJP ne Congress ban don ha ka bor hynrei ynda nga rem elekshon ïalade ki MLA kiba jop na ka party ynda nga la ong ba ki dei ban bat ïa ka nongrim ba ngi la khlei sha u paidbah kim sngap, don lei uwei uba ong ngan sngap leh aiu ïa u men rem, hynrei mynta ka kynti ngi don ha ka kynhun kaba don tang kawei ka jingmut kata ban kyntiew ïa ka jylla ha ki liang baroh,” u la bynrap.
U la ong ruh ba ka saiñ pyrthei jong ka VPP kam dei satia ka saiñ pyrthei ka thok ka shukor, ka saiñ pyrthei ka pynbiej briew hynrei u ong ba ka dei ka saiñ pyryhei ban thaw dur ïa ka jylla sha kaba kham bha.
Lah ban ïoh ha kane ka sngi da ki spah ngut ki paidbah ki la poi sha ka jingïalang wat la ka don ka jingpynthud kba jur ka mariang ha ka por dang step kaba ka bneng ka sdang ban rang tad haduh ba ka VPP ka sdang ïa ka jingïalang.
Ha kane ka sngi ki nongïalam ka VPP kiba wan ban shim bynta ki kynthup ïa u MLA na Mawlai u Bah Brightstarwell, u MLA ka North Shillong u Bah Adelbert Nongrum, u MLA ka Mawryngkneng u Bah Heving Stone Kharpran bad kiwei kiwei de ki nongïalam ka party.