Shuwa ban shim bynta ha ka International Marathon ha Delhi leit kitbok u Bah PT Sawkmie ïa u Ferick

Shillong, Risaw 09: U Bah PT Sawkmie, MLA barim ha ka sngi Balang ka 8 tarik u Risaw, 2025 u la kitbok bad kyrkhu kyrdoh ïa u samla Ferick Kitboklang Syiemlieh uba leit ïa shim bynta na ka bynta ka International Vedanta Delhi Half Marathon 21km Race kaban long ha nongbah Delhi ha ka 12 tarik u Risaw, ka sngi U Blei.
Haba ai jingïarap u Bah Sawkmie u la ong, watla um long eiei shuh, hynrei ha i bor barit u pyrshang ban ïarap ïa kiba donkam ïa ka jingïarap bad ha kajuh ka por u pynpaw ïa ka jingkyrmen ba u Ferick un ioh ïa ka jingjop ha kane ka jingleit mareh jong u ha Delhi.
Ha kajuh ka por u Bah Sawkmie u pynpaw ruh ba un ïai bteng ban shakri ïa ki paidbah bad ha i bor barit u long la kloi ban pyrshang ïarap ïa kiwei ruh kiba donkam ïa ka jingïarap.
Kane ka dei ka jingmareh half marathon kaba heh duh ha ka ri ba pynïaid da ka Procam International Authority bad ithuh da ka Association International Marathons (AIMS), kaban sdang mareh na Jawaharlal Nehru National Stadium, Delhi.
U kpa jong u samla Ferick u bah Badon Tham haba kren sha u nongthoh khubor u la pynpaw ba u Bah Sawkmie, kumba u ju thrang, ju leh burom, ju ïarap ïa kiba bun ki khun samla ka Mawlai ha ki sport bapher bapher naduh ki por mynshuwa, mynta ruh u dang ïai bteng. Ha kaba u la ong ruh, ai kane ka mynsiem ieit sport, ban pynshlur, ban kyntiew bad lam lynti ïa kiba bun ki khun samla barit ne baheh ka Mawlai ka ïai don bad ïai sah shi rta ha jingim bad ha ka jingthmu babha ka jong u ha ki por ban sa wan ruh.