SHILLONG, Nailur 11: Ka jingpynkhreh ïa ka 3rd Sohra International Half Marathon ka la ïaid shakhmat bad ha ka Sngi Balang ki bor pynïaid ki la ïoh ban leit jurip naduh Laitsohpliah (ka lynti ban sdang ka jingmareh) haduh Mawsmai (ka jaka ban pynkut).
Ha kane ka sngi la ïadonryngkat u Bah John Kharshïing – Working President ka MSOA, Bah Finely Pariat – General Secratary ka MSOA, Bah P B War Nongbri, K.Passah Asst director jong ka tnat Sports, ki dkhot na ka tnat PWD, ka koit ka khiah bad na ka tnat pulit, na ka ophis treikam u SDO bad kiwei dei ki dkhot jong ka Organising committee kiba la don ryngkat na bynta ka jingpynkhreh ïa kane ka marathon ban long ha ka 21 tarik Nailur 2024.
Ka jingmaramot ïa katei ka surok ruh ka la sdang. ïa ka jingïalang la pynlong ha ka Ophis treikam u SDO ka Sohra ban ïatai halor ka jingïaid shakhmat ki kam bad la rai ruh ban pynlong biang ïa ka jingleit jurip ha ka taïew ban wan.
Kane ka long ruh ka jingpynbna ba ïa ki Tshirt na bynta ka Run for Fun yn sam naduh ka 18 tarik mynta u Nailur naduh ka por 12 baje mynsngi haduh 5 baje nohphaisngi na bynta kito ba la thep kyrteng lyngba ka online. Na ka liang jong ka synjuk ka la kyrpad ruh ïa kino kino kiba thmu ban wan shim ïa ki Tshirt ba kin rah pynshisha ryngkat ka ID.
