Nongpoh, Naitung 04: Kum ka jingpynkhreh na ka bynta ka election 2023 ban sa long hapoh ka jylla na Mawhati Constituency bad kumjuh ruh ban dang pynkhlaiñ ïa ka kynhun, ka Mawhati Constituency Political Committee ha ka sngi Saitjaiñ ka la pynlong ïa ka jingïalang na ka bynta ban jied bad ban pynthymmai ïa ki nongïalam ka Committee ha ka jingïalang kaba la long ha ka Shnong Jatah ba hap ha Mawhati Constiteuncy.
Kum ba pynkynmaw, ka Mawhati Constituency Political Committee ka la dei ruh ka kynhun kaba la pynjop ïa u Bah Julius Dorphang kum u MLA barim ka Mawhati bad kane ka kynhun haduh mynta ka dang khlaiñ bad dang im bad ban dang pynkhlaiñ ïa kane ka kynhun ki la pynlong ïa ka jingïalang na ka bynta ban pynthymmai ïa ki nongïalam shi bynta ka jingpynkhreh na ka bynta ka election 2023 ha ka jylla na Mawhati Constituency.
Ha katei ka jingïalang ba la pynlong ha ka Shnong Jatah kane ka Committee ka la lah ruh ban jied ïa ki nongïalam ba thymmai ba kynthup ïa u Bah Anandapbor Mangu, kum u President, u Bah Corensius Manih kum u Vice-President, u Bah Mathias Mynsong, kum u General Secretary lem bad kiwei, nalorkata la jied haduh khyndai ngut ki Adviser, kiba kynthup ïa u Bah Edmund Marten kum u Chief Advider, nangta kiwei ki Adviser ki kynthup ïa u Bah B.D Laloo, Bah Alos Nongpoh, u Bah Rojen Sten lem bad kiwei.
Ka MCPC nalor kitei ki noingïalam ba hakhmat ka Committee, ha kane ka sngi ki la jied ruh 28 ngut ki executive members bad la rai ruh ban yn sa nang pynrung shuh shuh ha kine ki sngi ki ban dang wan, ka MCPC ka pdiang sngewbha ïa kino kino ki riew paidbah kiba kwah ban rung sha ka kynhun jong ka MCPC.
Ka Committee ba la pynthymmai ïa ki nongïalam, ka la buh ruh ka jingkyrpad sha baroh ki Primary Unit kiba don ha ki shnong bapher bapher ha Mawhati Constituency, ba kin dang ïaineh hapoh ka kynhun, namar kan sa don ka sngi kaba ki nongïalam ka MCPC, ba kin lum ïa ki paidbah, na ka bynta ba kin sa ai ka jingpynbna ba kin sa ai ka jingkyrshan ne ban ïatreilang bad ki kyrtong ba la rai lang ha kane ka Ilekshon 2023, khnang ba kin ioh ïa uta u MLA uba lah shisha ban kyntiew ïa ka Constituency bad ha baroh ki liang.
Ha kaba ïa dei bad ka jingshim rai ban kyrshan ïa uno u lane ka kyrtong ba ka MCPC kan ai ka jingkyrshan, ka Committee kan sa shong pyrkhat biang bad kan dang bishar bniah, namar kum ka Committee ka angnud ba uno uno u kyrtong lane ka kyrtong ba ka kyrshan ki dei ban poi sha ka thong jong ka jingjop bad ka jingjop u lane ka kyrtong ba ki kyrshan kan ai jingmyntoi ïa ki paidbah ha baroh ki liang hapoh ka Mawhati Constituency. Ïa kane ka kyrwoh la pynlait da u Bah Mathias Mynsong, General Secretary ka MCPC.
