Shillong, Jylliew 17: Kan long kaei kaei kaba lynngoh ban ioh ba ka tnat sam um jong ka sorkar jylla ka la leit ban buh ïa ki pipe um naduh surok bah G.S Road na lad Lynti Rim shaduh Mawïong mynta la palat shisnem hynrei ym pat ïoh dak ban sdang ban pyntrei ïa ka kam.
Lah ban ong ba ka shnong Mawïong baroh kawei ka dei ka jaka kaba ki paidbah ki ïakynduh ïa ka jingeh bha ha ka liang jong ka um, bun na ki longïing ki hap ban shu thied ïa ka um namar ba kam biang umbam umdih baroh shisnem lynter.
Ka khubor ka iathuh ruh ba kaba pynpoi Um ha Mawïong baroh kawei dei na ka jaka sam um kaba shu pump ïa ka um na ka wah Umshing, hynrei bunsien kane ka pump um ka duh namar kane ka pump ka dei kaba la slem bad ban ïoh tiar ban maramot haba ka sniew ka shim por bha.
Ka khubor ka iathuh ruh ban pynbiang ïa ka um ha Mawïong ka sorkar ka la kynthup lang ïa ka hapoh ka Greater Shillong Water Supply Schme (GSWSS) bad ki tyllong khubor ki ïathuh ba kitei ki pipe kiba la buh shilynter ka surok bah ka long ban pynïoh um ïa ka shnong Mawïong, Mawïong Umjapung bad Mawïongrim.
Kine ki pipe um kiba la buh ha shilynter ka surok ki don ar jait kawei kaba jyrngam bad kawei pat kaba ïong, ki pipe ba jyrngam ki kham heh ban ïa ki pipe kiba ïong, kine ki pipe um ki la don ha surok mynta la shisnem tam ha kaba ym pat ïohi ba kan don ka jingsdang ban pyntrei ïa ka kam ban ring um.
