Nongstoiñ, Naitung, 01: Ka seng UHM West Khasi Hills, ka la ther ïa u MLA Nongstoiñ u ba la shu sngap mynthi khlem pynpaw ei ei halor ka rukom sïang rong tang dep ïa ka surok Nongstoiñ-Sohpian.
Ka seng ka pynpaw ba ha ka jingshisha na ka liang u MLA u la dei ban da tuklar tyngeh ïa kane ka jingleh tang dep u Contractor. Hynrei, lyngngoh ba u khlem kren shikyntien ruh lane khlem leit wat ban jurip ïa ka jinglong jingman jong kane ka surok, kaba kumba long mynta la don bun jaka ba ka la sdang pra pynban.
Ka jingkular jong u ha ki snem mynshwa ban siang da ka Intermediate lane ka dei tang ka jingkular thok, ong ki nongïalam ka seng bad bynrap ruh kumba long mynta kane ka surok ka long tang ka surok baranda ïing jong ki heh saipan, ym da ka surok ba paka ba ki nongleit iew ne ki paidbah ki khmih lynti.
Kumba long mynta tang ban ïa pass ruh para kali rit ruh hap ban ieng kawei hadien kawei. Ka long ka jingbam sap ba shyrkhei bad kito kiba bam ei ïa ka bhah jong kiba long shida bad ïa ka jingroi jingpar ïa ka dong ka thaiñ jong ka West Khasi Hills, kin sa ïoh hi ïa la ka bainong, ong ki nongïalam ka seng.
Hato na ka liang u MLA bad ki Minister ka sorkar MDA ki shu hun beit kumne, ne hato ki la ïa don bynta lang ha kaba pynlong ïa kane ka surok kumne kumba ka long. Ka seng kan ym salia kum ïa une u ba wan kamai spah na kane ka District jong ka West Khasi Hills bad u bym sngap ïano ïano, ong ka kyrwoh
Ngi dei ban leh da ka kam kum ïa kine ki briew bad ki paidbah ki dei ban ieng tylli kawei ban pyrshah ïa kane ka jingleh jong ki riew bam sap, pynkut ka kyrwoh na u President UHM West Khasi Hills Bah Moon Nongrem.
