Nongstoiñ, Naiwieng, 12: Ki riew rangbah jong ka thaiñ Rambrai kiba kynthup ïa u bah Kwikly Marngar Sordar ka shnong Rambrai, bah Amishan Nongshilong bad kiwei kiwei kiba dei ki dkhot jong ka Dorbar, ki la pynpaw ïa ka jingbynñiaw bad ka jingsngewsih kaba jur eh ïa ki samla kiba na ka seng HYC, namar ka jingleit pyrta bad pyrshang ba pynwit pynthud jong kitei ki samla ïa u myntri rangbah ka jylla ha ka 9 mynta u bnai, ha ka por ba u wan ban plie ïa u Mawnongrim ka Rambrai C&RD Block ha katei ka thaiñ.
Haba ïakren bad u nongthoh khubor u sordar shnong u la ong, “Da ki phew phew snem ngi la thrang dik dik bad ap khmih lynti ïa ka roi ka par ha kane ka thaiñ. Nalor nangta ym pat ju don kiwei pat ki myntri sorkar jylla Meghalaya kiba la wan ban ïuh kjat ha ka thaiñ mynno mynno, khamtam ban wan ai ïa kum kane ka jingmyntoi na ka bynta u paidbah. Pynban tang une hi u myntri rangbah u ba la wan kaba la long ruh ka sien kaba nyngkong ba ngan ïohi ha ka jingim jong nga”.
“Hynrei ki samla ki la wan ban pyrshang pynwit ban long mawjynthud ïa ka roi ka par. Kumta ngi da lei lei ngim lah ban pdiang ïa kum kane bad ngi kyntu ruh ïa ki samla ba kin da kynmaw, ba lada khlem ka jingïatreilang bad ki bor shnong, to tip ba ki jingïakhih jong phi haba ïadei bad kino kino ki mat kiba phi ïakhih phin ym poi sha ka thong bad kan ym long ruh kaba bha”, ong u bah Kwikly Marngar Sordar ka shnong Rambrai
U la ong, “Tang ka rukom kren jong ki samla ha ki lad pathai khubor ruh ngi ithuh shai ba ki dei tang kiba la shu leh shongshit ym kiba leh shit rhem. Kano kano ka kam kaba la shu leh shongshit ka pynap jingma ym tang ïa uwei hynrei ïa baroh lang, kumta ki samla ki dei ban long rangbah ym kum ki khynnah”.
