K a jinglong jingman ha ka jylla mynta ka la nang i shyrkhei haduh katta katta haduh ba ka jingshngaiñ ïa ka leit ka wan naduh kiba dang khynnah haduh kiba la rangbah ruh kam long shuh kaba i shngaiñ. Balei kane ka jia haduh katne kattne haduh ka dei shisha tang na ka daw u drok lane ka don sa kiwei pat ki daw kiba kham palat ïa u drok lane ïoh ka khleh lang ruh ka jingbishni lane ka jingkwah shim kabu ïa ka jingjia kiba jia sawdong kylleng.
Ka jingjia ba dang shen ha Nongrah ka la dei kawei na ki jingjia kiba la pynkyndit haduh katta katta ïa ki nongshong shnong ka jylla baroh kawei khamtam haba ka daw jong ka jingjïa ka mih pynban da khongpong na kaei kaba ki paidbah ki mutdur. Watla ka jingtohkit halor kine ki jingjia ki dang bteng haduh mynta mynne hynrei ym lah pat ban tip kaei ka daw tynrai ba kum kine ki jingjia kiba kum ka Jaidbynriew tipbriew tipblei ka hap ban sakhi da ka jinglyngoh bad ka jingbym lah satïa ban pdiang ba kadei ka jingshisha.
Tiak lada phai dien na ka jingphriang ki khubor ba shah dung thyrnia injek dang shen ïa kawei ka khynnah, baroh baroh la ïa syier lut, don ki kmie ki kpa ki bym shngain shuh ban phah ïa ki khun ba kin leit skul hi don kiba la hap ban da buh da ki nongleit on bad nongleit shaw skul watla ki sah hajan ka skul ruh. Don pat kiba la pep ïa ki kam ki jam namar kim hun shuh ka mynsiem ban shu pyllait hi ïa ki khun ba kin leit bad wan hi sha iing watla ki la heh ka rta ruh. Tangba mar khongpong ynda la tohkit bha ki pulit kine ki jingjia ki dei tang ki jingjia kiba shu pynwandur ne kiba shu mutdur. Kiba kum kine ym tang ba ki ktah ïa ka bor pyrkhat jong ki paidbah hynrei ka ktah ruh wat ïa ka suk ka sain bad khamtam ïa ki tnad pulit kiba hap ban wad lut ki lad ki lynti tang kumno ban lap dien ïa ki briew kiba donkti shisha ha kum kine ki kam. Hynrei ynda la lap ïa ka jingshisha ka long pynban ka khubor ka bym sngewtynnad.
Kaba kham sngewsih ka long lada phai pat sha ki khubor kiba ju long khah khah bha, kata ka jingjah briew. Haba mih kum kine ki khubor lah ban ong ba kiba bun ki briew shisien ba la jah kaba mut ka la pynduh jingkyrmen lypa ïa ki bahaiing ha sem lane ki baieid ba thoin. Balei te ka jia kumne. Kaei ka jingpynsaja kaba kum ka Jylla bad kum ka Jaidbynriew ka leh ba kum kine ki jingjia ki jia man ka por haduh ba ka la pynkhihwin ki pynpar niangkhriat ïa man kawei pa kawei ka longiing kaba mad ïa kum kine ki jingkthang mynsiem. Dei ba don ka daw lada khlem ka daw kine baroh kin ym jia.
Lada kine ki kam bymman ki iai bteng ban synshar ïa ki shnong ki thaw bad lada ka rukom pyrkhat jong ki briew ka long beit tang ban myntoi ïalade kan sa poi ka por ba ka imlang sahlang kan sa shah bam kruin hano re. Ka por kam pat dier hynrei donkam pat ïa ki nongïalam kiban mih ban ïalam ym dei eh tang ha ki iing ki sem hynrei ha ka dong, ha ka shnong, ka thain bad ha ka imlang sahlang ban tylli lang kawei ban ym ailad ba ki bor u bymman kin ïoh jaka ban pynpait pynpra ïa ka iing ka sem, ka shnong ka thaw bad ka imlang sahlang.
Tangba, ha ka jingïakhun kan kham bha kumba ong ki riewtymmen, ‘Bha ba khun suki ban ïa kaba kdiah jubor’, lane ka bha ba ïakhun da ka lynti kaba jai jai khlem da kyrkieh ban thom da ka bor.
