Nongpoh, Lber 01 : Hadien ka rai shongthait jong u Bah Bandari Ryntathiang kum u President ka Confederation of Ri-Bhoi People (CoRP), mynta ka sngi na ka liang ka seng ka la jied bad pynskhem da ki nongïalam kiba thymmai ban kit ban bah ïa ka lyngkor ha ka jingïalang pynbam smai kaba la long ha Umsning Auditorium ban dang bteng ka jingshakri sha ki paidbah ka dong Ri-Bhoi.
Na ka liang u Bah Pateng Myrsing u ba dei ruh u Working President barim mynta u la shimti pat kum u nongïalam ba hakhlieh duh ka seng ryngkat u Bah Juban Swer bad u Bah Gershome Hat kum ki Vice President, u Bah Markus Makri General Secretary lem bad kiwei kiwei bad ïa kine ki nongïalam ba thymmai la pynbam smai da u Bah Bandari Ryntathiang President ba rim ka seng u ba dang shu shongthait.
Ha kane ka sngi ka jingpynskhem ïa kitei ki nongïalam ba thymmai la wan ruh ban shimbynta da u Bah AL Hek MLA ka Pynthorumkhrah kum u kongsan bad u Bah Orville Massar Addl. SP ka Ri-Bhoi kum u symbud kongsan ha ka jingdonlang u Bah Rocky Kylla Chairman ka Umsning Town Dorbar, Bah Roykupar Synrem President ka HYC u ba dei ruh u Chairman ka ComSO lem bad kiwei kiwei ki riew rangbah.
Haba kren ha kane ka sngi naka liang u Bah Bandari Ryntathiang kum u President ba rim u la sneng bad kyntu ïa kitei ki nongïalam ba thymmai ba kin shakri hok ïa ka kam kumba la bynshet ha ki watla u la iehnoh na ka seng hynrei un don bynta na sha lyndet ban kyrshan ïa ka seng ha kano kano ka mat bad ki sienjam ba kum ka seng ka shim.
U Bah Pateng Myrsing kum u nongïalam ba thymmmai u la ong ba kum ki dkhot bad ki nongïalam ba thymmai kiba la shah jied bad shah pynskhem ha kane ka sngi kim dei ban don ka jingmut haba ki rung sha ka seng ban kamai pisa hynrei ban trei bad shakri hok na ka bynta ki mat bad ki jingdonkam bapher bapher ba kum ki khun ka jaitbynriew ki ïakhun ban bha ban miat ka pateng ban wan.
U Bah AL Hek haba kren ha kane ka sngi kum u kongsan u la ai mynsiem ïa ki nongïalam ba thymmai da kaba pynkynmaw ruh ba ma u mynshuwa u dei uwei na ki nongïalam sengbhalang u ba la don bynta ruh ban seng ïa ka seng FKJGP, ba kum ki nongïalam kim dei ban long ki nongshah kynthoh hynrei ban trei hok ba ki paidbah kin pyrto ïa ki kam ba ki trei bad shakri la ka long ha kano kano ka bynta bad ai mynsiem ruh ba kin kamai hok ban trei ïa kano kano ka kam khlem jinglehraiñ namar kane hi kan kyntiew ïa ka ri bad khamtam ki bar jylla kin mih na kane ka jylla khlem da donkam ban beh.
