Nongpoh Risaw 25: Kum ka thong ban pynkup bor bad ailad ïaki khun samla ka thaiñ Ri-Bhoi ban shim bynta haki prokram bapher bapher khamtam ban sam ïaki jingstad, ka ophis jong u District Sports Officer, Ri-Bhoi District ka la pynlong ïa ka prokram kaba ar sngi lynter kaba la tip kum ka 3rd District Level Youth Exchange Program naka bynta ban kyntiew ïa ka sap nongïalam bad ki jingangnud jong ki samla halor ka phang ‘Today’s Youth, Tomorrow’s Leader’ ha District Library ha Ri-Bhoi.
Ïa kane ka prokram la pynkut bad pynhap pyrda mynta ka sngi ha kaba u Bah Mayralborn Syiem u la wan ïashim bynta kum u kongsan, haka jingdonlang u Bah Bobby L Nongbet, District Sports Officer ka Ri-Bhoi lem bad kiwei kiwei kynthup ki khun samla naka them Ri-Bhoi.
Ha kane ka prokram la wan ban shimbynta da ki samla kiba ha ka rta kaba 17 haduh 29 snem na ki saw tylli ki block: Umling, Umsning, Jirang, bad Bhoirymbong Block kumjuh ruh ki samla pule na Ribhoi College, Ribhoi Synod College, Balawan College, bad kiwei kiwei.
Ha kane ka prokram kaba ar sngi la pynlong ïa ki jingïakop bapher bapher, kynthup ïa ka shad tynrai, ka jingïakop rwai, ka jingthoh poitri, ka jingïathuhkhana, ka jingkren paidbah halor ki phang bapher bapher, ka jingpyni ïa ki sap, bad kiwei kiwei.
Ki nongjop na kine ki jingïakop ki la iohpdiang ruh ïaki khusnam hadien ka jingjop jong ki haki jingïakop bapher bapher bad naka liang ka ophis u DSO kala jied ruh katto katne ki samla ban mihkhmat naka district shaka State Level bad kumjuh ruh 2 ngut ki samla kila shah jied ban leit shim bynta shabar ri haka ri Indonesia.
Haba kren ha katei ka sngi kum u kongsan u bah Mayral Born Syiem u la ïathuh khana ïala ka jingim samla haki por bala leit bad ka long kaba eh ban mih shakhmat ban ieng haki rynsan namar ka jingsyier bad ka jingkyiuh haba ieng hakhmat ki paidbah, hynrei kum kine ki jait prokram ki long ka jingmyntoi kaba khraw ban ai jinghikai ïaki khun samla baki lah ban shim bynta bad ban weng ïa katei ka jingeh haka jingim jong ki.
U la kyntu ruh ïaki khun samla ba kane ka juk kam dei shuh ka juk kaba ki samla kin rieh bad lehraiñ ban mih shakhmat hynrei ban mih shakhmat ban shim bynta haki prokram bapher bapher bad kane kan wanrah ka jingkylla haka jingim jong ki, khamtam ban lum ïaka jingstad bad ban pyndonkam ïa ka ha ka rukom kaba dei.
