Shongshit ka tamasa bam ’Niang phlang ka Hima Lyngiong ha Umsohmat ba leit pynshngain u Myntri Sorkar

Shillong, Risaw 20: Kum ka sienjam ban pynneh pynsah ïa ka jingleh jong ki myn barim, ka Hima Lynniong ha ka sngi Nyngkong, kala pynlong ïa ka Tamasa Bam Niangphlang ha ka shnong Umsohmat. Kane ka tamasa ka long kaba phuh ba phieng bad shongshit bha da kaba ki paidbah jong ka Hima kila wan ban bam ïa u niangphlang uba la shet ha ki rukom bapher bapher. Kaba kham pynshongshit ka dei ka jingwan ïadon ryngkat jong u Myntri ka tnad Arts and Culture u bah Sanbor Shullai kum u kongsan ha kane ka sngi.
ïa kane ka tamasa la pynlong da ka Hima Lynniong da kaba ïatreilang bad ka kynhun KSKHAW bad UMWS. La plie ïa ka da u Myntri ka Tnad Arts and Culture Bah Sanbor Shullai kum u Kongsan ha ka jingdon lang u MLA ka Mawphlang Bah MB Kurbah, u Lyngdoh ka Hima Lynniong Bah Hamphere Lyngdoh Ryntathiang, ki myntri bad ki paidbah jong ka Hima.
U Lyngdoh ka Hima Lynniong ula ong ba kane kadei ka sien kaba saw ba kila pynlong ïa kane ka tamasa bad kane ka tamasa kadei thik tang na ka bynta ki paidbah jongka Hima bad ka Hima kala kyrpad ïa u Myntri Sorkar Bah Sanbor Shullai ban shimkhia lem namar ba ka Hima ka thrang ban pynneh pynsah ïa kane ka tamasa tynrai bad ban pynlong ïa kane ka tamasa kaba heh ha ki snem ban wan.
U Bah Sanbor Shullai ula ai ka jingïaroh ia ka Hima Lyniong kaba la shimkhia ha kaban pynneh ïa ka tamasa tynrai bad ïa kiwei kiwei ki jinglong tynrai jong ka riti, dustur bad ka kolshor.
“Ngan sa shimkhia ïa ka jingkyrpad jong ka Hima bad ha u snem ban wan, ngin sa pynlong ïa kane ka tamasa kaba heh da ka jingïatreilang hapdeng ka Hima bad ka Sorkar Jylla khnang ba kan ym dei shuh tang ka tamasa tang na ka bynta ki paidbah ka Hima hynrei kan dei ruh ka tamasa kaba khring ïa ki paidbah bad ïa ki nongjngohkai na kylleng ki jaka” la ong u Bah Sanbor.