Jowai, Nailar 26: Ka jingïalehkai phubol bala pynïaid da ka West Jaiñtia District Sports Association (WJDSA) kaba la long mynta ka sngi 26 tarik u Nailar ha ki ar tylli ki kyrdan kata ka ‘5th Adelbert Memorial Trophy 3rd Division Football 2025 bad ka ‘8th Debo Shullai Memorial Trophy 2nd Division Football 2025 bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong haka kyrdan 3rd Division ka Lumchyrmang Mihmyntdu kala jop da 2-0 kol ïa ka Y.S.Welfare Pynthorlangteiñ, ïaki kol na ka Lumchyrmang Mihmyntdu la thep da u Pynshai Biam haka minit ba 36 bad u Fredy Chyrmang haka minit ba 57.
Haka jingïakhun kaba ar ka Tpep-Pale kala jop da 6-0 kol ïa ka Lion Socio & Cultural ïa ki kol na ka Tpep-Pale la thep da u Reynar Mujat haka minit ba 33 & 45, u Wansa oo Biam haka minit ba 38 & 41, u Ebormi Bareh haka minit ba 49 bad u Kenny Rymbai haka minit ba 56.
Katba haka jingïakhun kaba lai kila poi sha ka jingïakhaid da mar shikol (1-1) hapdeng ka Youth Welfare Iooksi bad ka Saiñdur Mihmyntdu. Ïa ka kol na ka Youth Welfare Iooksi la thep da u Lasterwell Suchiang haka minit ba 67. Na ka liang ka Saiñdur Mihmyntdu la thep da u Fastermi Phawa haka minit ba 41.
Haba phai sha ka jingïakhun jong ka 2nd Division ka kynhun jong ka Dongmihsngi kala jop da 2-0 kol ïaka Shangpung Khliehmuchut, ïa ki kol naka Dongmihsngi la thep da u Daioshwa Siangshai haka minit ba 25 bad u Benison Suchiang haka minit ba 69. Ïa ka shikol na ka Shangpung Khliehmuchut la thep da u Bantei Langstang haka minit ba 10.
Ka jingïakhun kan bteng biang lashai 27 tarik u Nailar 2025 haka 3rd Division kan don lai tylli ki jingïakhun katba haka 2nd Division kawei ka jingïakhun.
