Shongshit ka jinglehkmen pdiang snem thymmai ka shnong Khanapara

Nongpoh, K’Lyngkot 11: Kumba ju leh man u snem ban lum ban lang ïaki nongshong shnong ban wanrah ka jingïatylli khamtam ka thaiñ Khanapara kaba dei ka shnong khappud bad ka Assam, naka liang ka Khanapara Youth Club haka sngi Saitjaiñ kala pynlong ka jinglehkmen ban pdiang ïa u snem thymmai bad la wan ruh ban pynshongshit ha kane ka sngi da ka heprit Jetsen Dona lama naka jylla Sikkim kaba dei ka lahduh jong ka jingïakop Saregamapa Lil Champ jong u snem 2022.
Ha kane ka janmiet nalor katei ka heprit kaba la paw haka ri, la wan ruh ban shim bynta ban pynshongshit ïaki paidbah nongshong shnong da ki nongrwai naka them Ri-Bhoi bad kumjuh na Assam ryngkat ka jingmih ryntih jong ki paidbah nongshong shnong ban lehkmen ha kane ka sngi.
Watla ka dei ka thaiñ khappud bad ka Assam kane ka sngi lehkmen ka long kaba kmen bad kaba shngaiñ khlem kano kano ka huri hura bad ki paidbah kila risa bad kynhoi hapdeng ka jingkmen bad ka jingsuk ban burom mar kylliang.
Lyngba kane ka sngi ka thong hi jong ka Khanapara Youth Club ka long ba ki paidbah na ka jylla Assam bad kumjuh ruh na Meghalaya ki dei ban don ka jingieid kum shi para ym ban pynmih kano kano ka huri hura watla ka jinglehkmen kadei ha Meghalaya ne Assam.