Shillong, Kyllalyngkot 29 : Ka jingïalang paidbah jongu kyrtong MDC ka NPP na ka 13-Saphai sha ka Jaintia Hills Autonomous District Council (JHADC) u ma Remdor Kupar Lyngdoh mynta ka sngi ha ka shnong Mooshrot ka long kaba shongshit bha namar da ki spah spah ngut ki briew ki la ïatuid sha katei ka jingïalang.
ïa ka jingïalang la pynïaid da u ma Niawkor Ruching bad la ai jingkren da u ma Roming Lamare Secretary ka shnong Mooshrot, ma Nehimaya Tyngkang, ma Aibor Shadap u MDC barim ka Baroto bad u Symbud Myntri Rangbah ka jylla u ma Sniawbhalang Dhar. Ha kane ka jingïalang hadien ka jingkren na u Symbud Myntri Rangbah ki paidbah da kawei ka sur ki la rai ban ai ka jingkyrshan ba pura ïa une u kyrtong ka NPP.
Namar na ka liang u Symbud Myntri Rangbah u la kren shai ba ka sorkar MDA ba la ïalam da ka NPP kan dang ïai theh ïa ki jingïarap sha ka constituency lada ki paidbah ki ai ka jingkyrshan ba pura ïa ki kyrtong jongka NPP. Namar u la ong ba dei tang kane ka sorkar kaba trei borbah ban wanrah ka jingkylla hapoh ka jylla baroh kawei. Dei ruh kane ka sorkar kaba la pynïoh ïa kiba bun eh ki surok hapoh ka jylla.Dei ruh ha kane ka sorkar ba ka New Shillong ka la sdang wan dur mynta khamtam dang ha ka 21 tarik la plie ïa u maw Nongrim ban tei noh ïa ka Secretariat ba thymmai ha New Shillong.
Lah ban pynkynmaw ruh ba ka Shnong Kyanmasar lei lei ka la rai ban kyrshan tylli ia une u kyrtong ka NPP u ma Remdor Kupar Lyngdoh khnang ba un ïoh ka jingjop ba don burom.
