Shongshit ka Food Fest ka CE Society Balang Presbyterian Saiden ban pynmih pisa ïaka kam u Blei

Nongpoh, Risaw 12: Ka C.E Society jong ka Balang Presbyterian, Saiden kaba hap hapoh ka Ri Bhoi Sepngi Presbytery jong ka Ri Bhoi Synod mynta ka sngi ka la pynlong ïa ka ‘Food Festival’ kum shi bynta ban pynmih pisa na ka bynta ban pyntyllun ïaki kam bad ki jingdonkam jong ka C.E Society.
Ïa katei ka tamasa bam la wan ban plie pyrda da u Bah Rocky Marwein kum u kongsan, ha ka jingdon ryngkat ki tymmenbasan jong Balang Presbyterian Saiden kiba kynthup ïa u Tbn S.Ranee bad Tbn A. Shongwan, u President ka C.E Society u Bah T Mynsong, u Rangbah Shnong u Bah E.K Lapang lem bad ki parabangeit jong ka Balang Presbyterian Saiden.
Lyngba katei ka tamasa bam la sakhi ruh ïaka jingshongshit jong ki samla ka Balang ban pynkhreh pynkhrum bad die ïaki jait jingbam bapher bapher naduh ka por mynstep naduh ki jingbam tynrai, ki jhur ki jhep ki soh ki pai bad kiwei kiwei ha madan phutbol jong ka shnong Saiden.
Haba kren ha kane ka sngi, na ka liang u Bah Rocky Marwein u la pynpaw ia ka jingsngewkmen ban don bynta lang ha kane ka sngi bad u la ai ka jingiaroh ia C.E Society ba ka la shim ïa kane ka sienjam kum shi bynta ban pynmih pisa na ka bynta ban pynbit pynbiang ïaki jing donkam jong ka C.E Society.
Na ka Liang U Bah Rocky Marwein u la nong synniang da ka song pisa kum shi bynta ban tynrong lang ia ka jingeh bad jingdonkam jong ka CE Society Balang Presbyterian Saiden.