Nongpoh, Jymmang 28: Ka Synjuk ki kynthei Katholik Umsohlait Parish, ka la pynlong ïa ka Seminar cum Mother’s Day, halor ka phang: “U leh isynei pateng la pateng ïa kito kiba tieng burom ïa u” (Lukas 1:50).
Ïa kane ka seminar la sdang naduh ka sngi saitjaiñ ha kaba la wan ban ïashim bynta shitrhem da ki 30 tylli ki Balang shnong bad kumba 400 tam ki longkmie kiba hap hapoh ka Umsohlait parish, ha ka sngi saitjaiñ baroh shisngi la ioh ban pynlong ïa ki seminar ha ka ba u Rev. Fr.Heronimus Lyngkhoi u la long u Resource Person.
Ha ka janmiet sngi saitjaiñ la pynlong pat ïa ka Choir Competition ha kaba 13 tylli ki Balang shnong ki la ïa shim bynta bad kiba nyngkong ka dei ka Balang Shnong Umsohlait, ba wan ba ar ka Balang Shnong Mawhati bad ka ba wan balai ka dei ka Balang Shnong Pdeng Nongrim.
La pynhap pyrda noh ïa kane ka Seminar bad ruh ka jingrakhe ïa ka Mother’s Day hynnin ka snig u Blei da u MLA ka Mawhati, u Bah Charles Marngar ha ka jingdon lang u Parish Priest, ki sister, ki nongïalam niam bad ki nongïalam ka Synjuk ki Seng Kynthei Katholik parish Umsohlait.
Ha kane ka sngi kyrpang, la pynkup burom ruh ïa ki 6 jur kiba la kynjoh 25 snem ka jingkyntiew kurim bad ïa ki shijur kiba la kynjoh 50 snem ka jingkyntiew kurim da u Parish Priest bad u MLA.
Ha kane ka sngi la ioh ruh ïa ki jingrwai kyrpang na ki Choir Group kiba jop ha ka Choir Competition, kata ka Umsohait, Mawhati bad ka Pdeng Nongrim, bad ha ka juh ka por ka la don ka jingpynkup burom ïa u Rev. Fr. Michael Sunn kum u Spiritual Director ka Synjuk ki Kynthei Umsohlait Parish bad uba dei ruh u Parish Priest kane ka Parish.
Haba kren ha kane ka sngi, U Bah Charles Marngar kum u MLA u la kren halor katei ka phang, da kaba ong ba kum ki Longkmie ki donkam ban tieng burom ïa U Blei bad haba tieng burom ïa u Blei kin ioh shibun ki jingkyrkhu ha ka longïing ka longsem.
U la ong ruh kine ki sngi bunsien ngi klet ban tieng burom ïa U Blei, hynrei ngi tieng tang ïa kiei kiei kiba ngi ïakynduh man la ka sngi ha ka jingim, ngi tieng ïa ki jingpang ba bunjait, ngi tieng ïa ki khun ki kti haba ki la heh la san, ngi tieng ïa ka lawei jong ki namar ka jingkyrduh kam kyrduh jam, ngi tieng namar ki jingsniew ba bunjait bad kaba ngim don pat kata ka jingtieng ïa U Blei.
Namar kata, u la kyntu da kaba ong bada lada ngi tieng burom ïa U Blei, U Blei un leh isynei da ki jingkyrkhu, un pynkhiah, un pynsting ïa ka jingkit, un pynioh ka jingkyrmen bad un weng ruh ïa ki jingsheptieng ki ba pyntieng ïa ka jingim jong ngi kaba man la ka sngi, u la bynrap.
