Nongstoiñ, Jylliew 6: Ka Seng United Hynñiewtrep Movement West Khasi Hill District hapoh ka jingïalam u President bah Moonstar Nongrem, Bishar Thabah General Secretary lem bad kiwei kiwei ki dkhot, ba kynthup na ka Nongstoiñ Circle, ka la ïoh ban rakhe ïa ka sngi pynneh mariang halor ka phang ‘Tang Kane kawei ka pyrthei’.
Kane ka jingrakhe ka la long ha ka shnong Umlieh ha ka 4 tarik ha kaba la ïashimbynta dang ki skul jong katei ka thaiñ ha ryngkat ki nonghikai. Na ka liang u President haba ai jingkren u la ong ka jingrakhe ïa ka environment day, ym dei ba shu rakhe tang ban pynsep ei ïa ka por. Hynrei dei ban don ka jingieid ïa ka mei mariang naduh ka mynsiem.
U la ong shuh shuh ba ka jingleit jong ki sha kine ki thaiñ kiba kham pajih na sor, ka long ban ai mynsiem ïa ki khamtam ïa ki khynnah skul bad ki nonghikai bad baroh ka thaiñ hi baroh kawei.
Ha katei ka sngi la ïa don ruh ki samla rangbah kiba wan ban sakhi ïa ka tei ka jingrakhe, kata u bah Mosklandar Marngar bad bah Wanphai Dkhar u ba dei ruh u Executive Member jong ka Green Tex jong ka Meghalaya. Ka seng ka la ïoh ruh ban thung ïa ki dieng bad sam tynrai dieng ha ki skul bapher bapher jong katei ka thaiñ.
La pynlong ruh da ka jingiakop kyntip halor ka mei mariang, ha kaba ïa ka nam lahduh la ïoh ban rah da ka Mawlangkhar SS, ka Salem Higher SS ha ka kyrdan kaba ar bad ka Khlurbarit SS ha ka kyrdan kaba lai. Ïa ka debate competition halor ka phang ‘Ka mei mariang ka dei ka jingduh nong bad mawjynthut ïa u briew’, ïa ka nam lah duh la ïoh ban rah da u samla Bankitbok Thabah, ka Ïairikmen Nongrum ha ka kyrdan kaba ar bad Ibalapynsuk bad u samla James Steven ha ka kyrdan kaba lai.
Ïa ki nongjop ha katei ka sngi ka seng ka la sam ruh da ka song pisa, ki trophy lem bad syrnod, kum ka dak ban nang pynshlur shuh shuh ïa ki khynnah pule ba kin nang ïai trei shitom ban poi sha ka thong.
