Nongpoh, Nailar 24: Ka Nongthynmai Kyrdem Football Club, ka la ioh ban rah ïa ka namladuh ha ka lympung ïalehkai kaba la pynlong da ka Umroi Block National People’s Youth Front Kyrdem Area, ïa kaba la pynlong ha madan ka shnong Kyrdem bad kata ka dei hadien ba ka la lah ban pynliem noh ïa ka Kyrdem Football Club, ha ka jingïakhun kaba la poi sha ka jingïashut Tie Breaker.
Katei ka Lympung ïalehkai kaba la pynlong da ka Umroi Block NPYF, ka dei ka jingïakhun da ki shnong kiba hap hapoh ka Raid Madan Kyrdem, ha kaba ka jingthmu ka Umroi Block NPYF, ban pynlong ïa katei ka lympung ïalehkai, ka long ban sei ïa ka sap ka phong jong ki khun samla kiba don ïa ka sap ha ka kam ïalehkai bad kawei pat ka bynta, ka long ban wanrah ïa ka jingïaithuh ithaw bad ka jingïaieid ïatylli hapdeng ki samla kiba hap hapoh katei ka Raid.
Ha katei ka sngi, ba la pynkut noh ïa katei ka Lympung ïalehkai, la sakhi da ka jingdon u Bah Wailadmiki Shylla, MLA Jowai bad uba dei ruh u President ka State NPYF, nangta u Damanbait Lamare, MLA Umroi, u Bah Cornelius Laloo, u Syiem ha Raid Madan Kyrdem lem bad kiwei.
Khyndiat haba phai sha katei ka jingïakhun phainal, ka jingïakhun ha ka kylla step bad kylla miet, ka la kut noh ha ka jingïakhaid kaba 1-1, hynrei haba la rah sha ka Tie Breaker, ka Nongthymmai Kyrdem FC, ka la ioh ban rah ïa ka namladuh ha kane ka lympung ïalehkai phutbol ka NPYF Raid Madan Kyrdem Area..
Ki nongai jingkren ha katei ka sngi, kiba kynthup ïa u Bah Wailadmiki Shylla, u Damanbait Lamare lem bad kiwei, ki la ïaroh eh ïa ki nongïalam ka Umroi Block NPYF, namar ba ki la lah ban pynlong ïa kaba kum katei ka lympung ïalehkai, kaba la long shisha ka jingmyntoi ïa ki khun samla, ba kin lah ban pyni ïa kata ka sap ka phong, nalorkata ka la long ruh kum kawei na ki jinghikai ba ki samla kin lait na ki jingdih ba sniew kiba la jyllei bha ha kane ka juk
Kum ka jingpynshlur, la sam ruh ka khusnam pisa bad ka trophy da kitei ki kongsan ha kaba ka Nongthymmai kum ka lahduh ka la ioh ban khur ïa ka song pisa kaba T. 30 hajar ryngkat ka trophy bad ka Kyrdem kaba wan baar, ka la ioh khur ïa ka song pisa kaba T. 15 hajar rygnkat ka Trophy nalor kiwei kiwei ki khusnam shimet.
