Nongstoiñ, Risaw 01: Ka kynhun kaba la tip kum ka Hala Tynrai Eco Tourism Co Operative Society Ltd Nongstoiñ, ryngkat ka jingïasnohktilang bad ka ophis na ka tnad jong ka Tourist Department Nongstoiñ, ki la ïoh ban rakhe ïa ka World Tourism Day haduh saw sngi kynthih kata naduh ka 27 tarik u Nailur 2025 haduh ka 1 tarik u Risaw 2025.
Ha katei ka jingrakhe la don ruh ki program bapher bapher kynthup naduh ka Football, ka jingïakop siat Khnam, ka jingïakop shondur, ka jingïaid kjat (Treking) ïa kaba la sdang naduh na Weinia Sangriang bad la pynkut pat haduh ka Kshaid kaba kyrteng ka La-Langchong Falls.
Ha katei ka jingïalang u bah Marck Diengdoh Tourist Officer Nongstoiñ West Khasi Hills District, u la long kum u kongsan ryngkat ka jingïadonlang ki nonglam khmat na ka kur Ïawren bad Ïawlar, u bah Overland Sangriang Sordar shnong ka Sangriang bad kiwei kiwei.
Ha katei ka programe kumba 200 ngut ki khun samla jong ka thaiñ ki la wan ban ïashimbynta shitrhem. Namar ka don ruh ka jingpynhut jong u slap, ym shym la lah ban pyndep lut kumta ki la hap ban bteng biang ban pynkut noh pat mynta ka sngi hapoh ka jingïalam u bah Banteiborlang Marweiñ shongknor ka Hala Tynrai Eco Tourism Co operative Society Ltd Nongstoiñ kum u nonglam khmat ïa katei ka kynhun baroh kawei.
