Shillong, ïaïong: Ka jingpynkut ïa ka jingrakhe Jubili Rupa jong ka Phudmuri Presbyterian Higher Secondary School ka la long kaba shongkun bad iphuh iphieng da ka jingdon ryngkat u myntri rangbah ka jylla u Conrad Konkal Sangma kum u kongsan, u MLA ka Mawlai Konstitwensi bah PT Sawkmie, kum symbud kongsan, MDC bah Teiborlang Pathaw, ba shah khot sngewbha kyrpang, ki pastor, ki tymmenbasan bad kiwei ki kynrem ki lyndan ba la rakhe ha hall jong kane ka skul hynne ka sngi.
Hashuwa ban sdang ka prokram, u Conrad u la plie ïa u mawnongrim na ka bynta ban tei ïa ka Higher Secondary School kaba la mang ban lut T.10 klur. Na ka bynta ban sdang ïa ka jingtei ka Balang ka la nohsynñiang T.25 lak bad na ka Chief Minister Development Fund 2019-20, 5 lak tyngka bad hadien kane u Conrad u la pynbna ba un mang biang sa T.20 lak kaban long baroh T.50 kaban kin ïoh ban sdang noh ïa kane ka jingtei jong kane ka skul.
Haba ai jingkren ha kane ka sngi u Conrad u la pynpaw ka jingkmen ban ïoh ïa kane ka lad ban ïa don bynta lang bad ka skul, bad kaba la long ka jingkyrkhu ïa ki khynnah skul.Ha ka ba ïa dei bad ka vision ne jingïohi jngai u la ong, “Lada ka vision ka long naka bynta shi snem bad kwah ban ïohi noh ïa ka result ha ka shisnem, phi dei ban thung syntiew, namar ba hapoh shisnem phin ïoh ïa u syntiew, lada ka jingiohi ka dei na ka bynta ka 10 snem, thung da u dieng ba hadien 10 snem phin ïoh ïa u soh bad lada dei na bynta ka bymjukut, bsa pjiah ïa ki briew ne thung briew, ka donkam ba ngin pynlut ha ki khynnah, ha ki samla, ha ka imlang sahlang.Nalor kata u la ong ruh ha ba phi thung briew phin ïoh ïa u soh na ka bynta ka bymjukut,” ong u Conrad.Ha kajuh ka por na ka liang une u myntri rangbah bad kiwei ki la ot ruh ïa u cake jong ka jingdap 25 snem bad ki la pyllait ruh ïa ka Souvenir jong ka skul.
Kumjuh ha kane ka sngi na ka liang u Bah PT Sawkmie u la ïoh ban pyllait ïa ka website jong ka skul.Ha ba ai jingkren u bah PT Sawkmie u la pynpaw ba ka lynti ïaid jong ka jingdap 25 snem kam dei ka ba lyngkot, hynrei kaba jrong bad ka don bun ki mawjynthud hapdeng kita.“Ka skul ka la sdang na i ïing barit bad ka la kiew mynta sha ka RCC building, na ka Lower Primary sha Higher Secondary School,” ong u bah Sawkmie.
Ha kane ka sngi la ïoh ruh ka jingkren na bah Teiborlang Pathaw bad na ka Principal, Kong Phila Rynjah, ba la kren pdiang sngewbha bad ai khublei ïa u Myntri rangbah ka jylla halor ka jingnoh synñiang jong u na ka bynta ka jingtei.
Ha ka juh ka por ka skul ka la pynkup burom ruh ïa ki 5 ngut ki nong hikai ki ba la hikai 25 snem bad kane ka skul, ba kyn thup ïa ka kong P. Rynjah, principal, kong N. Nong siej, kong L. Kharsyntiew, kong S. Thabah bad ka kong I Sawkmie.
La pynphuh iphieng ruh ia kane ka sngi da ki prokram shad na ki khynnah skul, rwai na ki nonghikai bad kiwei ki prokram pynbyrngia ïa ki kmie ki kpa kiba la wan ban sakhi bad don bynta lang ha kane ka jingrakhe jong ka skul.
