Shillong, Nailur, 03: Ka Christ Church Morning School, Mawlai Syllaikariah ha ka sngi Saitjain ka la pynhap pyrda noh ïa ka jingrakhe Jubili Rupa hapdeng ka jingiphuh iphieng kaba la lehkmen baroh shisnem lyngba ki prokram bapher bapher kiba la pynlong da ka skul
Ha kane ka sngi la don ryngkat u MLA jong ka Mawlai u Bah Brightstarwell Marbaniang kum u kongsan, u MDC u Bah Teiborlang Pathaw kum symbud kongsan, ki nongïalam ka Managing Committee jong ka Christ Church Morning School, ki nonghikai, khynnah skul, kmie ki kpa bad kiwei kiwei.
La pynkup burom ruh ïa ki nonghikai kiba la hikai teng ha kane ka skul step bad kumjuh de ïa kiwei kiwei ruh kiba la don bynta bad ka skul ha ka jingïaid lynti jong u mawmer ba 25 snem.
Haba kren kum u kongsan u Bah Bright u la pynpaw ba ka jingnang jingstad ka long kaba donkam bha bad u la pyrto ïa ka Christ Church Morning School kaba la ïaid ïa u Mawmer ba 25 snem ban sei bun ki khynnah kiba nang bastad, wat hapdeng bun ki mawjynthud.
U pynpaw ba u khmih lynti ba ha ki 25 snem kiban wan kane ka skul kan jam pat sha u mawmer ba 50 snem, bad ha une u snem ki khynnah ba pule mynta ki la heh la san bad khmih lynti ba kin kiew ha ka jingpule jong ki.
U Bah Teibor haba ai jingkren u la pynpaw ba ka long shisha ka jingmyntoi kaba khraw ïa ki khynnah kibym ïoh leit skul sngi na kadaw ki kam bylla jong ki bad ban leit pat ïa ka skul step.
Ha kane ka sngi la ai jingkren ruh da u President jong ka Managing Committee u Bah Alexander Syiem, ka kong F. Sun bad na u Headmaster ka skul step u Bah B. Lyngdoh.
