Amlarem, K’lyngkot 27: Ka Ophis jong u Sub-Divisional Officer (Civil), Amlarem Civil Sub-Division ka la rakhe ïa ka 77th Republic Day ha madan Amlarem Government Primary School.
Ha kane ka sngi la wan sakhi lang naduh u MLA ma Nujorki Sungoh kum u kongsan, ha ryngkat ka jingdonlang ki ophisar na ki tnat sorkar bapher bapher, ki khynnah skul, ki nonghikai bad ki paidbah paidbah nongshong shnong ka thaiñ.
La sdang ïa ka jingrakhe da ka jingpynher ïa ka lama ka ri, ka jingrwai National Anthem bud sa ka March Pass kaba itynnad eh ba la shim bynta da ki pulit bad ki khynnah na ki skul bapher bapher.
Ïa ka nam jop ha ka March Pass la wan ba nyngkong 1st da ka Mang Hai Ryum Higher Secondary School, Amlarem, 2nd ka Sohkha Government Higher Secondary School, Sohkha bad ka nam 3rd da ka Nongtalang Government Higher Secondary School, Nongtalang.
Ha ka Cultural Programme la wan ba nyngkong 1st da ka Mang Hai Ryum Higher Secondary School, Amlarem, 2nd ka Lyea Rhen Dimiat Village Organisation, Padu Mawsku bad 3rd ka Thangbuli Upper Primary School.
Ha ka jingpyni paidbah ïa ki kam jong ki tnad sorkar lyngba ki Tableau Presentation la wan ba nyngkong 1st da ka Sub-Divisional Agricultural Officer, Amlarem, 2nd ka Block Development Officer, Amlarem, 3rd ka Sub-Divisional A.H. & Veterinary Officer, Amlarem. Baroh kila don haduh hynriew tylli ki tnad sorkar kiba ïashim bynta haka ‘tableau presentation’ kiba kynthup shaphang ka koit ka khiah, ka Jal Jeevan Mission, ka jingïoh jingïarap lyngba ka NRLM, ka jingpynsngewthuh halor ka hok thep vote bad kiwei.
Ha kane ka sngi u Block Development Officer, Amlarem ula sam ruh ïa ka nam Best Performing Self Help Group sha ka Deimonlang Self Help Group, Mupyut, Best Performing Anganwadi Worker sha ka Kong Aidaroi Khyriem, la pynkup burom ruh ïa Dr. Fernandez Lamin, Senior Medical & Health Officer, In-Charge Jarain, ka kong Lumlang Pohthmi, MLHP, Khonglah Sub-Centre bad ka kong Aletorisa Nongjngi, MLHP.
Na ka liang u kongsan haba ai jingkren ula ban jur halor ka jingdonkam ban burom ïa ka Constitution ka Ri, ban kyntiew ïa ka jingïatylli ka jingkitkhlieh bad ban pynshlur ïa ki samla ban shim bynta ha ka jingtei ïa ka ri. Ula pynpaw ka jingsngewnguh ïa baroh ki tnad sorkar, ki skul bad ki paidbah kiba la ïatreilang ban pynlong ïa kane ka jingïarakhe kaba jop.
La pynkut ïa ka prokram da ka jingïasam ïa ki khusnam bad ki certificate.
