Nongstoiñ, Nailur 26: Kum ka jingkynmaw burom ïa ka lyngkhuh snem kaba phra jong ka jingkhlad noh jong u (L) bah Hopingstone Lyngdoh, u ba la khlad noh ha ka 26 tarik Nailur jong u snem 2016, ki nongïalam ka Hill State People Democratic Party, ka la pynlong ïa ka jingrakhe kynmaw burom ha Langpih ha sngi hatmajai kata ha ka 26 tarik, ha ka jaka ba la tei ïa u mot sah jingkynmaw ïa utei u nongseng jong ka party bad u nongïalam ban dawa ïa ka jylla ba pura.
Ha katei ka jingrakhe ïa kane ka sngi, ki nongïalam ka party naduh u bah K.P.Pangñiang President rangbah, u bah Panborlang Ryntathiang secretary, u bah Methodius Dkhar MLA ka Mawshynrut, ka kong Badariti Lyngdoh Nonglait president jong ka Women Wing seng kmie, u bah Martle Mukhim MDC ka Mawkynrew, u bah Diostar Jyndiang Ex MLA, ki volunteer kiba la ïa don bynta ha ka jingdawa Hill state bad kiba la shah set phatok, ki nongïalam jong ka party na ki zone jong ka constituency, ki riew rangbah ka Raidmynsaw, ki sordar shnong ka thaiñ ki longkmie jong ka thaiñ Langpih, ki nonghikai bad khynnah jong ka Raidmynsaw Upper & secondary school bad ki paitbah ki la ïadonlang.
Ha ka jingrakhe kynmaw burom, la pynlong ruh ïa ka jingïalang ha kaba la pynïaid da u bah Panborlang Ryntathiang bad la pynlong ruh ka jingleit buh syntiew ha u mot sah jingkynmaw ba la tei da ka Raidmynsaw ha ka ïew Langpih. Hadien ba la dep buh syntiew la sdang ïa ka jingïalang ha kaba la ïoh ïa ka jingkren lyngkot na u bah Hindro Samakhau bah K.P.Pangñiang, bah Methodius Dkhar, ka kong Badariti Lyngdoh Nonglait bad na u bah Martle Mukhim MDC ka Mawkynrew u ba dei ruh u Vice president ka HSPDP seng kmie.
U bah K.P.Pangñiang haba ai jingkren u la ong ba ka jingtei ïa u mot sah jingkynmaw ha katei ka jaka, kam dei kaba shu tei nam hynrei ka don ïa ka jingmut kaba jylliew bha. Namar dei na ka jinglah jong u (L) Maieit Hoipngstone ban pynrung ïa ka Langpih Sector ha ka Census bad ka Electoral roll jong ka United Khasi & Jaintia Hills,ha ka por ba u long u MLA/MDC naduh u snem 1962 haduh 1967-71 bad MDC naduh 1958-1967 1967 haduh 1971 bad u la long ruh kum u Executive Member u ba peit ïa ka Inter district boundary ha ka por ba ka sorkar Assam ka dang synshar.
U la ong ruh ba ïa ka jingpynrung ïa katei ka sector ha ka UK&J Hills la mynjur ruh da u P.Chaliha Myntri Rangbah ka Assam ha katei ka por. U la ong ba lada ym dei na ka jinglah jong u ban pynrung ïa katei ka sector ha ka United Khasi & Jaiñtia Hills, kam don jingmut shuh ban dang ïa kren ba katei ka thaiñ ka dei ka bynta jong ka West Khasi Hills.
U bah Methodius Dkhar MLA ka Mawshynrut haba ai jingkren, u la ong ba ha ka por ba u Maieit Hoping u dang im um shym pat la rung sha ka HSPDP, hynrei katto katne snem shuwa ba un khlad noh u la sdang ban ïadon bynta ha ka saiñ pyrthei bad haba u pyrkhat ïa ka jinglong jong u maieit Hoping, um lah ban shu tip tang na kaba ïohsngew bad ka jingïathuh kiwei. Hynrei u la wad bniah bha da kaba pule ïa ki kot na ki Library, bad ki magazine kiba batai ïa ka jinglong bad ka jingtreikam jong u bad dei halor kata ka nongrim ba u la sngewthuh shai ba dei tang u maieit Hoping u ba don shisha ka jingkitkhlieh na ka bynta ka ri bad ka jaitbynriew.
U la ong ruh ba ka dei ka sien kaba nyngkong ba un poi da lade ha shong Langpih bad ban ïohi ïa ka jingeh jong ki paitbah na ka jingshah klun ïa ki jaka ha ka sorkar Assam. Ka jingdonlang jong u ha kane ka sngi kan long ruh ka kabu kaba khraw ba kum u dkhot jong ka Regional Committee on Border Dispute, un pynsngewthuh sha ka sorkar Meghalaya bad Assam ba ka Langpih sector kam dei ban hap sha Assam hynrei ka dei ban don beit ha Meghalaya.
U bah Martle Mukhim haba ai jingkren u la pynkynmaw ïa ka jingïatrei lang jong u bad u maieit Hoping bad u la ong ruh ba ha ka por ba wat ka sorkar Assam ka burom bha ïa u. Nalor kata u la pynkynmaw ruh ïa ki por kiba eh bad kiba jynjar ha ka jingleit tur jong ki sha ki thaiñ Lyngngam, hynrei kim ju salia namar ki don ka jingkitkhlieh na ka bynta ki paitbah.
