Mawkyrwat, ‘Nailar 15 : Ha ryngkat ka Ri India baroh kawei, ïa ka 79th Independence Day la rakhe ha ka 15 tarik u ‘Nailar, 2025 ha madan jong ka Nativity Higher Secondary School, Mawkyrwat ha kaba u Ma Comingone Ymbon, Myntri ba dei peit ïa ka charge Co-operation Department, Food Civil Supplies & Consumer Affairs Department, Home (Civil Defence and Home Guards) Department, Water Resources Department, Government of Meghalaya bad kiwei jong ka Sorkar Meghalaya u la pynher ïa ka Lama Lai rong jong ka Ri bad shim ruh ïa ka Rashtriya Salute na ka bynta ki 10 tylli ki skul, kynthup ïa ki NCC, ki Scouts, ki Guides bad ka Police Department.
Hadien ba kut ka March Past, la pynbud da ka Cultural Items ba la shimbynta da ka ki khynnah skul jong ka Nativity Higher Secondary School, Mawkyrwat, ka St. Xavier’s Higher Secondary School, Umoid, Jawahar Navodaya Vidyalaya (JNV), Mawkyrwat bad na ka Jingïaseng Kynthei Higher Secondary School, Mawkyrwat kynthup ruh na ki nonghikai skul, na ka Kynjoh Shaphrang Village Organisation bad ka Hope of Life.
Ha kaba ïa dei bad ki nongjop ha ka March Past, ka Modern Academy Higher Secondary School, Rangmaw ka la wan ha ka kyrdan ba nyngkong, ka Maharam Government Higher Secondary School, Mawkyrwat ha ka kyrdan ba ar bad ka Rising Secondary School, Sohkhyllam ha ka kyrdan ba lai. Ym tang kata, la ïoh ruh ban sam ïa ki syrnod sha baroh kiba la wan ïa shimbynta ha kane ka sngi ba kyrpad naduh ki skit, ki jingshad bad ki jingrwai kyrpang.
Shuh shuh ha kane ka sngi la sam ruh ïa ka khusnam sha ka Mawthawpdah Primary Health Centre kaba la ïoh ïa ka nam Top Performing Primary Health Centre hapoh ka South West Khasi Hills District kaba la pyntreikam bha ïa ka Megha Health Insurance Scheme (MHIS) bad ka Ayushman Bharat Pradhan Mantri Jan Arogya Yojana (AV PM-JAY).
Kiba la ïadonlang ha kane ka sngi ki long u Deputy Commissioner, South West Khasi Hills District, Mawkyrwat, u bah Barnari Mawlong, IAS, u Additional Deputy Commissioner, South West Khasi Hills District, Mawkyrwat, u bah F.B. Basan, MCS, u Superintendent of Police, South West Khasi Hills District, Mawkyrwat, u bah B. Jyrwa, MPS, u Block Development Officer, Mawkyrwat C&RD Block, u bah I. Lawrniang, MCS lem bad kiwei de ki ophisar sorkar jong ka South West Khasi Hills District.
Kiwei de ki program ha kane ka sngi, ki long ba ka South West Khasi Hils District Swimming Association (SWKHDSA) ryngkat ka jingïatreilang bad ka ophis u Deputy Commissioner, South West Khasi Hills District ka la pynlong ïa ka 7th Annual Swimming Competition 2025 ba la kyrshan ruh da ka ophis u District Sports Officer, South West Khasi Hills District ha kaba ïa kane ka jingïakop la pynlong ha Phot Mawpoh, Mawkyrwat.
Lah ban kdew ruh ba ïa kane ka jingrakhe ïa 79th Independence Day la pynlong ruh hapoh Ranikor Civil Sub Division, Ranikor ha kaba Dr. Celestine Lyngdoh, MLA of Umsning Constituency u la pynher ïa ka Lama lai rong bad shim ruh ïa ka salute na ka bynta ka jingïaid parade jong ki 9 tylli ki skul kynthup ïa ka kynhun jong ki pulit ba la pynlong ha madan jong ka Nolikata, Ranikor Civil Sub Division, Ranikor C&RD Block.
