Nongpoh, Nailur 21: Hapdeng ka jingiphuh iphieng bad ka jingkmen kaba khraw ka Confederation of Ri Bhoi People (CoRP), mynta ka sngi kala ioh ban rakhe ïaka u mawmer ba 25 snem jong ka jingïaid lynti jong ka seng naduh bala seng ïaka ha u snem 1996 naka bynta ban ai ka jingshakri ïaki paidbah ka dong Ri-Bhoi ha baroh ki liang bad ïa katei ka jingrakhe la pynlong ha Umsning Auditorium.
La wan ruh ban sakhi ha katei ka sngi da u Bah Metbah Lyngdoh Lamphang ka iing Dorbar thawaiñ ka jylla kum u kongsan, u Bah Renikton Lyngdoh Tongkhar Myntri ka tnad PHE ka jylla Kum u symbud kongsan, ki MLA ka Ri Bhoi ba kynthup ia u Bah Mayral Born Syiem MLA Nongpoh, Bah George B Lyngdoh MLA Umroi, Bah Jason S Mawlong, Bah Charles Marngar MDC Mawhati, ki nongïalam ka CoRP naduh u Bah Doris Sulein uwei naki nongseng jong ka CoRP, Bah Bandari Ryntathiang President ka CoRP ba mynta, ki nongïalam jong ki kynhun sengbhalang bapher bapher bad kiwei kiwei ki riew Rangbah bad ki riew pawkhmat naka them Ri Bhoi.
Ha katei ka sngi naka liang ka seng kala ioh ruh ban pynlait ïaka Souvenir halor ki kam ba kum ka seng kala lah ha ki snem bala leit noh naduh bala seng ïaka bala pynlait paidbah da u Lamphang ka jylla bad kiwei kiwei ki riew rangbah, ryngkat ka jingot ïa u Cake kum ka dak ka jinglehkmen ïaka jingdap 25 snem jong ka seng.
Ka seng kala ioh ruh ban ai da ki khusnam bad ka jingpynkup burom ïaki riew pawkhmat na Ri-Bhoi kiba la noh synñiang sha ka imlang ka sahlang haka dong Ri-Bhoi, ki nongmihkhmat barim, ki nongthoh khubor bad kiwei kiwei.
U Bah Doris Sulein uwei naki nongseng jong ka Confederation of Ri Bhoi People haba kren ha katei ka sngi u la ïathuh halor ka jingïaid lynti jong ka seng naduh bala seng ïaka ha u snem 1996 ha kaba ki don tang 3 ngut, u Gershom Syngkli, u Doris Sulein bad u Juris Muktieh, bad kam dei kaba suk ban pyntyllun ïaki kam ki jam naka bynta ban shakri ïaka dong Ri Bhoi, hynrei hapdeng ki jingeh ba bun ka seng kala nang roi bad nang kiew shaphrang ha kaba la nang lah ban pynïar ïa u thup u thiar bad ki nongkitkam jong ka seng bad long ruh kawei naki seng ba paw bha ha Ri Bhoi, bad haduh ba u la shongthaid u Bah Doris Sulein u la bat ïaka kam President kumba 21 snem hadien bala shimti pat ïaka kam nongïalam da u Bah Bandari Ryntathiang.
Naka liang u Bah Metbah Lyngdoh kum u kongsan haba kren ha katei ka sngi u la ong ba tang na ka kyrteng CoRP ka pynsngewthuh kaei ka jingmut jong kane ka seng, ki mawmer ba 25 tylli kila ïaid bad shibun ki jingeh ngi sngewthuh ba kum ki nongïalam ki mad haka jingiaid lynti hynrei khlem kynran dien hapdeng ka jingiphuh iphieng kum ka seng kala lah pat ban rakhe ïaka jingdap 25 snem haka jingshakri jong ka haka dong Ri-Bhoi.
U la ong ruh ba ka Ri Bhoi ka dei kaba riewspah haka tynrai ka riti ka dustur kaba long ka jingsarong kaba khraw ïaka dong ka thaiñ bad ka jylla baroh kawei, hynrei ngim dei ban klet ïaka ka jong ban pynim ïala ka tynrai la ha kano kano ka bynta da kaba ngi ieid ïaka ka jong bad burom ïaka jong kiwei naaka bynta ban pynsah nam tynrai kaba la buh naduh ki mynbarim.
U la kyntu bad ai mynsiem ruh ïaki nongialam bad ka seng baroh kawei ba kum ka seng kan dang kiew shaphrang ban ai ka jingshakri sha ki paidbah bad kam dei kaba suk ka jingïaid lynti ba 25 snem jong ka seng hynrei ryngkat ka thong ban jam shaphrang bad ka jingmut jingpyrkhat kaba don ka jingkitkhlieh kyrmen ba ka seng kan dang lah ban leh ïaki kam ba bha, ym ban don kano kano ka mynsiem bishni pihuiñ hynrei ban tylli kawei naka bynta ka ri bad ka jaitbynriew.
La ai jingkren ruh ha katei ka sngi da u Bah Renikton L Tongkhar, Bah George B Lyngdoh, Bah Mayral Born Syiem, Bah Jason S Mawlong kiba la pynpaw ka jingsngewkmen kaba khraw ban don bynta ha katei ka sngi ban sakhi ïaka jinglehkmen dap 25 snem jong ka seng CoRP ba kum kawei naki kynhun sengbhalang kaba la paw ha Ri-Bhoi ka don ka bynta kaba khraw ban trei bad shakri naka bynta ki paidbah ka dong ka thaiñ kumba ki seng bhalang ki don ka bynta kaba khraw haka synshar khaddar ban shim ïaki mat bad ki issue bapher bapher naka bynta ka ka roi ka par bad ka bha ka miat jong ka jaitbynriew bad kyrmen ba kum ka seng kan dang lah shuh shuh ban shakri bad ban wanrah ïaki jingkylla haka imlang ka sahlang.
