Shongkun ka jingïakynduhlang ka Khasi Jaiñtia Catholic Community (KJCC) ha Guwahati

Jowai, Rymphang 09 : Ki khun samla ka Balang Katholik kiba shong ba sah ha kylleng ka Nongbah Guwahati kiba hap hapoh ka Khasi Jaiñtia Catholic Community Guwahati, hynnin ka sngi U Blei kila pynlong ïa ka jingïakynduh lang kaba nyngkong ne ka 1st Annual Get Together & Freshers Meet ha SFS Shrine Narengi Guwahati hapoh ka jinglamkhmat u Raimanki Khonglah kum u President.
Ha kane ka jingïakynduhlang la pynlong ïa ka Mass bakhuid bad ka nguh Blai da u Fr. George Thomas, MSFS Provincial Guwahati ha ryngkat ka jingpynkupbor ïa ki Nongkitkam ba thymmai ka KJCC ha ka jingdonlang u Fr. Ganesh Shangpliang, Parish Priest ka Narengi, Fr. Anthony Kattathara kum u Spiritual Director, Fr. Cletus Sebastian SDB, Regional Youth Director ryngkat ki Sisters, Brothers, ki nongshah khot sniawbha bad ki khun samla kiba la poi 340 ngut eiei.
Ha kane ka sngi la wan sakhi lang da u Kyrmen Shylla, MLA ka Khliehriat kum u Kongsan, u samla Wellson Siangshai, President ka Jowai Diocese Catholic Youth Movement (JDCYM) kum u Special Guest.
Na ka liang u kongsan haba ai jingkren ula ai ka jingïaroh ïa ki Nongkitkam ka KJCC Guwahati kiba la pynlong ïa kum kane ka jingïakynduh lang ki khun samla Khasi Jaiñtia. Ula kyntu ïa ki khun samla nyngkong ba kin buh hakhmat ïa U Blai ban don ka jingïatylli, ka jingïarap mar kylliang bad ban kiar na ki kam sniew kiba bun jait jong ka juk ba mynta khamtam ïa kiba shong basah sha jngai na ka ïing ka sem.
Ha kani ka sngi la pynkupburom ruh ïa ki khun samla pule kiba wan shakhmat ha ki jingpule kum ka dak ban pynshlur shuh shuh ïa ki.
La pynphuh pynphieng shuh shuh ïa kane ka sngi da ki jingrwai, ki jingshad, ka Skit na ki samla pule ha ki University wapher wapher hapoh ka ka Jylla Assam. La pynkut ïa kane ka prokram da ka Jam Session lyngba ka put ka tem, katba ïa ki kyntien ai khublei la ïoh na ka Secretary ka Daffnie M Mawrie.