Jowai, Jylliew 22: Kumba ju long manla u snem ka Dorbar Ñiam jong ka Raij Jowai, ha kane ka 22 tarik u Jylliew kala pynlong ïa ka jingïalang ba kyrpang na ka bynta ‘Ki Kñi bad Ka Kshu Ka Siang’ ha Madan Kñia Pyrthat, Dulong Poh-hali, Jowai.
Ïa ka jingïalang la pynïaid da u Raymond Nartiang, Pator Raij Jowai, la ïoh ka nguhblai na u Valentideo Paswet, Sangot Paswe. Katba ma P. Kynjing, Dolloi Elaka Jowai ula ai jingkren ha kaba ïadei bad ka ñiam, ka rukom, ka dustur, riti.
Shuh shuh u Dolloi ula ong ka Dorbar Niam hapoh ka Raij Jowai kala sdang naduh ki por kiba u Syiem Pyrthat ula wanrah ïa ki Saw ngut shi para, ki khun Puri Blei kiba long ki nongseng ïa ka Raij, Ka shnong kumjuh ka ñiam ka rukom. Ula ong ruh ka Dorbar Niam ka long ka Dorbar kaba hukum da u Trekirot bad kum ka pateng jong ka juk dei ban pynkhraw shuh shuh ïa ka jinglong kyrpang bad kyntang ka Dorbar Niam naduh ki ïing ki sem haduh ka Raij ka Shnong.
Na ka liang u ma H. Toi, President Seiñraij Jowai ula pynsngew ïa ki kam kiba ka Seiñraij kala leh na ka bynta ka thong bna kyntiew kynrong ïa ka ñiam ka rukom, dustur, riti kumjuh ruh ïa ka bha ka miat haka imlang sahlang jong ki khon ka ñiamtrai ha baroh ki liang. Ula kyntu ïa ki Kñi, ka Kshu ka Siang ba kin long kiba ïatreilang, khnang ba kino kino ki jingthmu kiba ka seng kan leh kin long kiba jop bad kiba poi sha ka thong.
La pynkut ïa kane ka Dorbar da ki kyntien ai khublei bad kitbok kitrwiang na u Raymond Nartiang, Pator Raij Jowai.
