Shillong, Naitung, 30: U Lat ka jylla u CH Vijayashankar u la pynïaid ïa ka jingïalang pyrkhat kam halor ka National Tuberculosis Elimination Program (NTEP) ha Raj Bhavan, Shillong. Ka jingïalang ka thmu ban bishar bniah ïa ka jingïaid shaphrang, ban weng ïa ki jingeh, bad ban pynsted ïa ki jingpyrshang ban pynlong ïa ka Meghalaya kaba lait na ka jingpang TB.
U State Mission Director, National Health Mission (NHM) u Ramakrishna Chitturi, u la ai ïa ka kaiphod kaba bniah halor ka jingtreikam jong ka NTEP ha ka jylla Meghalaya.
U Lat u la pynksan ïa ka jingangnud baskhem jong u Myntri Rangbahduh ka ri ban pynduh ïa ka jingpang TB bad u la pynbna ïa ki jingïalang bishar bniah manla ar bnai bad ka kynhun jong ka Jylla ban buddien ïa ka jingïaid shaphrang jong ka kam.
U Lat u la kular ban ai baroh ki jingkyrshan ba donkam na ka Raj Bhavan bad u la kular ban pynbiang ïa ki marbam na ka bynta ki 150 ngut ki nongpang TB na ka bynta hynriew bnai.
U la pynpaw ba ka jingshakri ïa ka imlang sahlang ka dei ka jingkyrkhu bad ka kamram kaba kyntang. “Haba ngi ïawan lang da ka jingsngewrit bad ka jingkut jingmut, ym don jingeh kaba ngim lah ban jop.”
U Lat u la kyntu ruh ban pynjur ïa ka jingpeit bad jingleh test ïa ka jingpang TB, ban pynlong ïa ki jaka sumar ba kyrpang na ka bynta ka jingpang TB, ban ai ha ka por kaba biang ïa ki jingmyntoi bad ki marbam, ban kyntiew ïa ki Nikshay Mitra ban pynshlur ïa ka jingïashim bynta mon sngewbha, ki jingïarap ba la thmu na ka bynta ki paidbah ba shah ktah, ban pynkhlaiñ ïa ka jingpynsngewthuh ïa ki jaka skul, ki kolej bad ha ka imlang ka sahlang ban pynduh ïa ka jingpeit ibeiñ bad ban ai jingkyrshan ïa ka jingsumar ba kham kloi.
