Shillong, Jylliew 14: U Lamphang jong ka Ingdorbar Thawaiñ ka Jylla u Thomas A. Sangma u la lum ïa ka jingïalang pyrkhat kam ha ka sngi Thohdieng ha Assembly Secretariat, Khyndai Lad, Shllong ban pan jingtip kaba bniah halor ka jingpyntyllun ïa ka jingshna ïa ka Assembly ba thymmai ha Mawdiangdiang.
Ha ka jingïalang la ïashim bynta lang da u Myntri ka Sorkar Jylla u Conrad K. Sangma, u Symbud Myntri Rangbah uba khmih ïa ka tnat Parliamentary Affairs bad PWD (Buildings) Bah Prestone Tynsong bad u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar, u Chief Secretary Bah D.P. Wahlang, u Commissioner & Secretary jong ka tant Finance & Planning u Dr. Vijay kumar D, u Commissioner & Secretary ka tnat Parliamentary Affairs u Bah Cyril Diengdoh, u Secretary PWD, u Chief Engineer PWD Building, u Technical Adviser bad kiwei kiwei ki ophisar.
Nalor kine, ki Ophisar na ka Meghalaya Legislative Assembly Secretariat kiba kynthup ïa u Commissioner and Secretary u Bah Andrew Simons bad u Secretary u Malthus S. Sangma, ryngkat bad ki nongmihkhmat na ka tnat PWD, Planning, Finance, Urban Affairs, bad Parliamentary Affairs ki Technical bad ki Engineer ki la ïashim bynta lang ban ai jingmut ha kane ka jingïalang.
Ka jingïalang ka la ïathir sani ban ithuh ïa ki jingeh, bad ka jingbuh thong ban shna pyndep ïa ka Legislative Complex jong ka jylla kaba dang ïaid shakhmat.
Haba kren sha ki lad pathai khubor, u Thomas A. Sangma u la ong, “kane ka dei ka jingïalang bishar kam kaba bniah ïa ki kam kiba dang ïaid shakhmat. Ngi la shim ïa ki sienjam ban pynthikna ba yn pyndep hapoh ka por ba la buh, hynrei ngi don ka jingangnud ba ka jingshna ka dei ban long kaba paka. Ngim lah ban shu pynkyrkieh ïa ka kam.”
Haba pynpaw ïa ka jingeh jong ka projek, u la kdew, “ka Iingdorbar kam dei ka projek kaba hap ban shu shna tang dep rukom. Ki don bunjait ki rukom shna ba kynthup ïa ka jaka ap pahara, ka jaka pyndait ïa ka Audio bad visual, ki kor pynsawa, ki jingshna ba laiphew jait bad ka jingsiang ïa ki carpet ïa kiba ngim lah ban shu shaniah tang ha kawei ka dukan kaba die ïa ki tiar. Ngi hap ban da khmih janai ïa ka dor ka mur.”
Haba kylli, u Lamphangn u la batai ba ka kynhun baroh kawei ka dang trei shitom katkum ka jingthmu ba la buh.
“Ki lah ban don hangne hangta ki kam ba lah ban mih khlem poi pyrkhat Ngi la hap ban long kiba phikir bha halor ka jaka ap pahara bad ka jingpyndait ïa ki kor pynsawa.
