Jowai, Ïaïong 25: Ki khun ka Seiñ Raij Ialong mynta ka sngi kila ïamih da ka jingshong kun ban leit sakhi ïa ka ‘Noh Sakyriat’ ba la pynlong ha madan ka Seiñ Raij, kaba long kum ka dak ban lehkmen hashwa ba ki khun ki hajar kin sdang ban leit rep sha ki hali ki pator bad ban bet ïa u kba u khaw.
Ïa kane ka ‘Noh Sakyriat’ la leh hashwa ka Shad Sukra kaba la pynbeit ban pynlong lashai ka sngi, la ka ïohi mynta ka sngi ki khun ka Seiñ Raij Ialong kila wan ban ïashim bynta lang ha kane ka ‘Noh Sajyriat’ da kaba pynshong ïa ki kynthei ha baroh arliang jong u dieng ba la shna kyrpang bad ki shyrang uba long kum u kñi u kpa ula shim bynta ban khynñiat ïa Sakyriat.
Na ka liang ka Seiñ Raij Ialong ka kyrmen skhem lyngba ka jingpyndep ïa ki jinglehñiam bapher bapher hashaw ka Noh Sakyriat kan wanrah ïa ka bha ka miet bad kumjuh ka roi ka por jong ki khun ki hajar,
U President ka Seiñ Raij Ialong u ma Pyrkhat Shylla haba batai kyndiat shaphang kane ka ‘Noh Sakyriat’ ula ong kane ka long ka ñiam kaba la pyndep ha baroh shi taiew da kaba Kñia ïa ka 30 Rynkaw bad kane ka long kaba khampher haba ïa nujor bad kiwei de ki shnong.
Ki don ki snem kiba ka Seiñ Raij kala pynlong da ka jingkñia ‘Sapetbeng’ bad mynta ka snem kila pyndep ïa ka kñia ki 30 Rynkaw jong ki ‘tawiar takan’ ka shnong, ula pyntip ruh ba ïa ka kñia ba ki khot ka ‘Sapetbeng’ la kñia da ka doh Masi ïa kane ruh la leh shisien shipor.
Hashwa kane Noh Sakyriat la don ka jingïalang ba lyngkot ba la pynïaid da u Sectretary ka SRI Juhhi Pale, ha kaba la wan ban sakhi da u kongsan uba dei u MLA ka 2-Jowai u ma Wailadmiki Shylla uba la ai ruh ka jingïaroh ïa ka Seiñ Raij Ialong kaba la lah ban pynlong na ka por sha ka por ïa kane ka ‘Noh Sakyriat’ ban pynneh pynsah ïa ki riti ki dustur jong uba rim ba jah bad ha ka juh ka por u MLA ula pynbna ba la plie ïa kane ka ‘Noh Sakyriat’ bad ‘Shad Sukra’ mynta ka snem.
Kiwei de kiba ïadon lang ki kynthup ïa u Dolloi ka Elaka Shangpung u Chanki Langbang, u Waheh Shnong ma T. Ram Phawa, ki nongïalang ka Seiñ Raij Ialong bad bad kiwei de kiba la shah khot sngewbha.
