Shong jingïalang ka Peace Committee rai ban shah leit ot kba ki nongrep Lapangap ha khappud Assam ryngkat ki kyndon

Jowai, Risaw 20: Ka jingïalang jong ka Peace Committee kaba la long mynta ka sngi ban wanrah ïaka jingshong suk shong shngaiñ hapdeng ki ar jaitbynriew jong ka shnong Lapangap (Meghalaya) bad ka shnong Tahpat (Assam), hadien bala mih ka jingïakynad kaba jur haka por leit ot ïa u kba na ki hali pynthor ha Lapangap West Jaiñtia Hills District.
Ha ka jingïalang ïasngewthuh jingmut bala pynlong ha Border Out Post (Assam) ha Khanduli la ka jingdonlang naduh u DC ka West Karbi Anglong District u SP Sarma, u Border Magistrate ka West Jaiñtia Hills, u G.H. Passah nalor u Waheh Shnong na ka Lapangap bad na Tahpat, ki nongïalam ka Synjuk ki Waheh Shnong ka Ri Jaiñtia, ki dkhot seng bhalang nalor kiwei de.
Ha kane ka jingïalang kila shim ïa ka rai ban wanrah biang ïa ka suk ka saiñ ha katei ka jaka khappud ba ïakynad, ban wat ïa ki briew kiba donkti ha ka jingpynïap ïa uwei u briew jong ka Karbi ïa uba la tip kyrteng Orivel Timung bad ban weng noh ïaka kyndon jingmana (curfew) hatei ka jaka, khnang ban sdang noh ka jingleit ot kba.
Shuh shuh la pynsngew ba ym donkam shuh ban pynlong biang ïa ki jingïalang namar kaba donkam eh ban ban don ka jingïasngewthuh jingmut lang hapeng kitei ki ar jaitbynriew kumba long naduh ki por mynshaw.
Na ka liang ki kynhun kiba dei na ka Karbi kila pynbeit lashai hi ka sngi kin lum ïa ka jingïalum paidbah bad ban pynsngewthuh ïa ki paidbah ka shnong Tapat ban shah noh ka jingleit ot kpa jong ki briew ka shnong Lapangap da kaba pynbeit ruh ha ryngkat ki kyndon.