Shong dum tliw tliw ki shnong ha thaiñ War Jaiñtia la 3 bnai na ka jingduh Transformer

Jowai, Jylliew 05: U ma K. Pohshna uwei na ki riew rangbah ka thaiñ War Jaiñtia uba dei ruh u Adviser ka Synjuh Ki Waheh Shnong ha ka kyrwoh ba phah sha u ‘Mawphor’ ula ïathuh ba ki don katto katne tylli ki shnong kiba la duh Transformer la 3 bnai tam khlem pat ïoh bording haduh mynta.
Wat na ka liang kitei ki shnong ki la kyrpad sha ki riew rangbah ka War Jaiñtia ban ïakren bad ki bor jong ka MeECL ha Lum Jingshai Meghalaya Shillong ba kin sngewbha ban ïarap lem ban pynïoh kloi ïa kine ki transformer kiba laduh ha kine ki shnong naduh u bnai April, May, June. Kiba la shong hapdeng ka jingdum tliw tliw bad shem shitom ha ki bun ki liang ha ka imlang sahlang.
Halor kane na ka liang u Bah Pohshna haba ïakynduh ïa kitei ki shnong ki la kyrpad sha ka Synjuk Ki Waheh Shnong ba kan kyrpad sha ka MeECL ba kan pynïoh lem ïa kine ki transformer na ka bynta kine ki shnong kiba kynthup ïa ka shnong Pamtbuh kaba don tang 5 Km na Amlarem, ka Pdengkseh kaba don tang 15 Km na Amlarem, ka Padu bad kiwei kiwei
Shuh shuh u ma Pohshna lyngba ka ‘Sur u Paidbah’ ula kyrpad jur ïa ka MeECL kaba peit na ka bynta kane ka bor elektrik ban pynïoh kloi ha kine ki khyndiat sngi khnang ba yn ïoh ban pyndonkam bording biang ha kitei shnong, kumjuh ruh u Bah Pohshna lyngba ka Synjuk Waheh Shnong War Jaiñtia ka ban jur ruh ïa ka office MeECL Sub-Divisional ha Amlarem kaba dang sahteng ba kam pat don ki nongpeit nongkhmih ïa ki office kumba ladep phah jingthoh sha u CMD ba un wad ki lad ki lynti ban buh tang da ki Muster Roll (linemen) ha Amlarem.
Khnang ba kane kan ai jingïarap ïa ki linemen kiba don tang khyndiat kiba shem shitom ban leit pynbiang ïa ki jingdonkam jong ki shnong khamtam ha kine ki por lyiur ba ki mainline ki ïaid lynba ki khlaw ki btab kumta ka donkam ban buh ïa ki Muster Roll (linemen) ba kin ïoh ban pynkhuid bad ïarap ïa kine ki linemen ba la don lypa.
Sa kawei kaba kongsan eh la kyrpad ïa ka tnad MeECL ba kan wad ïa ki lad ki lynti ha ka ban wahrah noh bad ban buh stock hapoh ka Amlarem Sub-Division khnang ba kan pynsuk shibun ïa ka leit ka wan ha kine ki thaiñ nongkyndong bad kan wahrah ïa ka shong suk shong saiñ ha kaba ïadei bad kane ka jingeh ba ïakynduh na ka jingduh bording.