Shillong, Jylliew 23: U Symbud Myntri Rangbah ka jylla u Bah Prestone Tynsong, uba khmih ïa ka tnat Public Works Department (Roads), u la shong bishar kam ïa ki projek shna surok ba pyntreikam da ka National Highways and Infrastructure Development Corporation Limited (NHIDCL) ha Meghalaya.
Kine ki projek ki kynthup ïa ka Shillong-Dawki road project, Shillong Western Bypass, Speed Corridor, bad Tura bypass.
Haba kren sha ki lad pathai khubor hadien ka jingïalang u Bah Tynsong u la pynpaw ka jinghun halor ka jingïaid jong ka kam ka Shillong-Dawki road project, wat hapdeng ka jingshah tynjuh na ka jingjur u slap.
“Nga thikna ba kin lah ban pyndep katkum ka contract order da ka NHIDCL. Nga la ïohi ïa ka kam ba ka la ïaid bha shakhmat, haoid ki don ruh ki jingeh na ka daw jong u slap hynrei nga thikna pat ba kin lah ban poi sha ka thong katkum ba la buh ha ka work order,” u la ong.
Na ka liang jong u, u la bthah ruh ïa ka NHIDCL ba kan pynsted ïa ka kam khnang ban lah ban pyndep ha ka por jong u snem 2026. Kane ka projek ka kynthup ruh ïa ka Pynursla, ha kaba ka kam ka la ïaid sted bha.
U Bah Tynsong u la pyntip ruh ba ka Shillong Western Bypass project ka mad ïa ki jingeh ha kaba ïadei bad ki kam jaka.
U la bthah ruh ïa ki district collector ba kin shimkhia haba ïadei bad kane ka jingeh khnang ba kan ym ktah ïa ka jingïaid beit ka kam bad ban pyndep ha u snem 2026.
U Symbud Myntri Rangbah u la shong bishar kam ruh haba ïadei ba ka jingjurip ïa ka Speed Corridor kaba sdang na Barapani, Umïam, sha khappud Assam kaba lah jandep.
U Bah Tynsong u la shong bishar kam ruh ïa ka jingtyrwa ïa ka Tura bypass, ha kaba kane ka project ka la ïaid da ka 3D notification ba la pynkhreh da ki deputy commissioner ka West Garo Hills bad South West Garo Hills.
