Shna pynbha bad ai rong ki nongdie doh ïa ki dukan ha Basa Doh ha ïew Mawkyrwat

Mawkyrwat, ‘Naitung, 28: Ka long kaei kaei kaba itynnad ban ïohi ba hadien ka jingpynmih jong ka High Courts ïa ki jingbthah bad ki kyndon kiba ïa dei bad ki nongot-doh, na ka liang ki nongot-doh ha ïew Mawkyrwat ki la ïa bunkam ban shna ïa ki dukan jong ki bad kane ka long ruh kum shibynta ban kohnguh katkum ka jingbthah ba la pynmih.
Katkum ka jingbthah napoh jong ka high court la ong ba baroh ki dukan die doh ba kynthup ïa ki nongdie doh masi, sniang bad doh syiar kim dei shuh ban thad madan ïa ki doh hynrei ki dei ban shna kyrpang da ki jingker khnang ba kan long kaba itynnad bad kaba khuid ba suba ban lait na shibun ki jingpang ha kaba ym shah shuh ban long kum mynshwa hynrei ki dei ban leh katkum ba la bthah da ka sorkar.
U President jong ka Synjuk ki Nongot-doh jong ka Mawkyrwat Hat, bah P. Ramsiej u la pynpaw ba hadien ka jingpynmih hukum jong ka High Courts kiba ïadei bad jingbthah ryngkat ki kyndon ha kaba ïa dei bad ki nongot-doh, kumta na ka liang ka Synjuk ki Nongot-doh ha ryngkat bad ki ophisar ki bor jong ka distrik ki la pynlong ka jingïalang ba kyrpang halor kane ka bynta bad da kawei ka sur ki la ïa mynjur ban kohnguh katkum ba la bthah da ka sorkar khnang ban lah ban pynwar dur bad ban wanrah ïa ka jingkhuid jingsuba ha ki liang baroh bad kumjuh ruh ha ki dukan die doh kiba don hapoh jong ka ïew Mawkyrwat, South West Khasi Hills District.
Shuh shuh la ong ruh ba na ka liang ka ka Synjuk ki la ïa rai ban khang shipor ïa ki dukan die doh kata naduh ka 27, 28 bad 29 tarik u ‘Naitung, 2022 bad kim pat shah ïano ïano ki nongdie doh masi, doh syiar bad doh sniang ban shong ne plie dukan hapoh ïew Mawkyrwat hynrei la ai jingpyntip ne bthah ba kin sa plie pat ha ka 30 tarik u ‘Naitung, 2022 bad kyrpad ruh ba kin ïatreilang khnang ba kaei kaba ki ki thmu kan long kaba jop.