Shna kloi ïa ka surok NH-6 ïoh klang ka ding jong ka jingïakhih: KSU-EJHDU
![](https://mawphor.com/wp-content/uploads/2023/07/nh-6-Copy-1.jpg)
Khliehriat, Risaw, 11: Khlem shongthait, khlem sngap jar, ka Khasi Students Union East Jaiñtia Hills District Unit, ka la pynpaw syndon da ka jingbyrngem ban iakhih da kaba tyngeh ban pyn klang ïa ka ding jingiakhih lada ka sorkar bad ka NHAI kam shim khia ban maramot bad ban pyntrei ïa ka surok National Highway -6 ha East Jaiñtia Hills District, lyngba u kyrwoh ka seng ka pynpaw da ka jingsngew bitar “Pyntrei kloi ïa kane ka surok NH-6 ioh yn klang ka ding jong ka jingïakhih”
Katkum u kyrwoh, ka seng ka pynkynmaw biang ba “Ka KSU East Jaiñtia hills District Unit myn ha ka 10 tarik u Risaw ka la buh da ka jingthoh sha u ADC ka East Jaiñtia Hills District ban wad jingtip ba haduh katno ka kam ban maramot ïa ka surok ka la ïaid bad ha ka jingiakynduh ki nongïalam ka seng bad u ADC hynnin ka sngi halor ka jing pan jingtip ne pan ïa ki kaiphot ha kaba iadei bad ka surok, ka seng ka ioh jingtip ba ka National Highway Authority of India kam i lah shuh ban shim ne bteng ïa ka kam bad ka sorkar ka dei ban phai khmat noh sha ka NHIDCL ban maramot bad pynbha ïa kane ka surok”
“Shuh shuh la ïathuh ba ka jingslem jong ka jingpyntrei ïa kane ka surok ka dei namar ba ka NHAI ka khot tender tang ban maramot ïa ka surok, ym ban shna pynbha shuh shuh bad la ar sien la dep khot tender ban iakhun ban ioh (Bid) tang uwei. Ka seng ka la pynkynmaw ruh ba ka jingslem ka long ba bun na ki liang jong ki nongtrei jong ka NHAI ki la shah thep sha along namar ba don ka jingbam sap kaba shyrkhei bad ki kam thok kam shukor kaba dei ka ejahar ha ka kam bamsap (fraud and corruption case)” ong u kyrwoh. .
La ong ba ka seng ka la ioh jingtip ruh ba u Myntri rangbah ka jylla ruh u la khot bad iakren bad ki nongmihkhmat kiba na ka thain East Jaiñtia Hills District lem bad kiba mih khmat na ka NHAI bad ka la don ruh ka jingjurip, hynrei watla katta ruh ki kam kim pat shym la paw satia bad ym don ki dak ki shin ban maramot ïa kane ka surok kaba la jot rathai.
“Na ka liang ka seng ka kren da kaba shai ba lada long ha kano kano ka dur ruh, ka seng ka kwah ban ioh ïa ka surok ba bha ba miat, ka seng lem bad ki paidbah kim tip ïa kita ki jingeh ba don hapoh, hynrei ka sorkar ka dei ban sdang ban wad ïa ki lad ki lynti mar mar khamtam ha kane ka por ba dang ailad ka pyrthei ka mariang ban trei ïa ka kam. Ka Seng ka kyrmen ïa ka ba bha bad khmih lynti ba ka sorkar ka peit mat noh” pynkut u kyrwoh na ka KSU East Jaiñtia Hills District Unit.