Shna ka Soil and Water Conservation ïa ka RCC Dam ha ïapmala ban tan um sha ki lyngkha

Khliehriat, Naiwieng, 08: Ka tnat Soil & Water Conservation, East Jaiñtia Hills District ka la pyntrei ïa kawei ka projek pynlang um ne RCC Dam ha ka shnong Ïapmala, East Jaiñtia Hills District da ka jingbei tyngka na ka NABARD- RIDF (Rural Infrastructure Development Fund) kaba kot T. 20 lak.
Ha ka jingjurip jong ki lad pathai khubor ha ka sngi Palei, la lap ba ka jingshna ïa ka project ha ka shnong Ïapmala ka la ai jingmyntoi ïa ki nongrep kiba rep ha kawei ka lyngkha kaba heh bha bad la shna bha ïa ka jaka pynlang um ba la tip kum ka RCC dam.
U Divisional Soil and Water Conservation Officer, East Jaiñtia Hills District Bah F.Syiemiong haba kren sha ki lad pathai khubor u la ïathuh ba ïa kane ka project la khot kum ka Umthing River Valley Project.
“La mang pisa ïa kane ka projek da ka NABARD, RIDF (Rural Infrastructure Development Fund) kane ka dei ka RIDF 27 (sanction 2022-2023). Ngi ïoh kumba T. 20 lak baroh bad kane kaba ba ngi shna ka dei ka RCC Dam ban pynlang ïa ka um bad tan ïa ka um sha ki jaka rep. Ki don haduh kumba hynriew haduh hynñiew ïing kiba im da ka rep kiba la ïoh jingmyntoi na kane ka projek,” la ïathuh u Bah Syiemiong.
“Mynshwa kane ka jaka rep ka don kumba 5-6 hectare ka jingheh bad mynta ngi la lah ban pynpoi um sha ki jaka rep bad na kane ka projek ngi la ïohlad ruh ban pynheh shuh ïa kane ka jaka rep sa kumba 3 hectare bad mynta ka jaka rep ka la poi sha ka 9 hectare,” la ïathuh shuh shuh u Bah Syiemiong.
U la ïathuh ruh ba ki nongrep kiba rep ha katei ka jaka ki la ïoh jingmyntoi shibun na kane ka project bad ong ruh ba kane ka um ba la pynlang ha ka RCC dam la pynpoi sha ki jaka rep da kaba shu tan da ki pipe lane kata ka Piping Irregation bad la tan bha bad pynpoi ïa ka um pat sah ki jaka rep da ki nala.
“Mynta ngi ïohi ïa ka jingkylla, na ka liang ki nongrep ruh ki la pynpaw ba ki kwah ban ïoh pynheh shuh shuh ïa ka rep ka riang. Kumba na ka liang jong ka ophis ruh ngin la nang ïarap shuh shuh ïa ki,” u la bynrap.
Haba ïathuh shuh ïa ka jingpynlut pisa ban tan ïa ka um lyngba ki pipe sha ki lyngkha rep, u Bah Syiemïong u la ong, “ha kane ka dam la pynlut T. 7 lak ha ka Iregation Piping bad ki nala Prregation Piping pat ngi pynlut T.8 lak. Ban pynheh ïa ki jaka rep ngi la pynlut T1.60 lak. Ka don ruh ka Infrastructure Development Fund (IDF) kaba dei lang bad kane ka projek,” bad bynrap ba ka ophis Soil & Water Conservation ka la pyntrei ruh ha kaba shna ïa ka jingkieng ïaid kjat ka ban ïarap ïa ki nongrep ban jam sha shiliang kawei ka wahrit bad kane kan pynsuk ïa ki nongrep kiba wan na ka thaiñ Ïapmala.”
“Mynshwa kiba rep kba ki lah ban pynmih 150 kwintal u kba na ka shi hecatre ka jaka rep bad mynta pat hadien ba la pynheh ïa ki jaka rep bad ka jingbiang ka um ba ki ïoh na kane ka Dam ka la kiew khyndiat ha kaba pynmih ïa u kba. Na ka liang jong ka ophis ngi khmihlynti ba ka jingpynmih kan kiew shaduh 200 kwintal ha ka shi hectare bad na kane ka um, ngi khmihmynti ruh ba ki nongrep kin ïoh ban rep wat ha ka por tlang ruh da kaba ki lah ban rep da kiwei kiwei ki jait jingthung ruh kiba dei ha ka aïom tlang,” la ïathuh u Bah Syiemiong.
Ki nongrep kiba la don lang ha ka jingjurip jong ki nonglum khubor, ki pynpaw ka jingsngew kmen bad ka jingsngewnguh ïa ka tnat Soil & Water Conservation, East Jaiñtia Hills District kaba la ïarap ban pynïoh ïa kane ka jaka pynlang um ne ka RCC Dam.
Ki la ïathuh ba ha ka jaka rep ne ka pynthor ki don ki jaka ki bym ïoh um ruh na ka bynta ban rep hynrei da ka jingdon kane ka RCC Dam ka la ïarap ïa ki ha kaba mynta ka um ka la poi sha ki jaka rep.
Ki nongrep ki la pynpaw ruh ba mynta ba ki la ïoh ïa ka um kaba biang ki khmihlynti ba kin sa lah ban kyntiew ïa ka rep bad ka jingpynmih ïa ki mar rep bad kin sa shim ruh ïa ki lad ban ri jingri ruh ha ka jaka kaba don ha ka shnong Ïapmala.