Nongpoh, Jylliew 21: Ka long ka jingkmen kaba khraw ïa ka paidbah nongshong shnong ka shnong Saiden, ha kaba na ka liang ka Dorbar Shnong mynta ka sngi ka la lah ban plie paidbah noh ïa ka Jingkieng ïaid kjat kaba la pynshna da ka Dorbar Shnong ha ka Dong Lad ïewsir ba hap hapoh ka Shnong Saiden ha Ri Bhoi District.
Ïa kane ka jingkieng la plie paidbah da u Rangbah Shong U Bah E.K Lapang bad la sakhi lang ruh da ka jingdon lang u Secretary Shnong u Bah E.J Myrthong, ki kdhot ka executive committee bad ryngkat ki paidbah nongshong shnong.
Ka daw kaba la pynlong ïa ka Dorbar Shnong ban shna ïa kane ka jingkieng, ka dei namar ba bun ki paidbah ki shem jingeh ha ka leit ka wan ban kam ïa ka wah, hynrei da kaba shnong ïa kane ka jingkieng ka la pynsuk ïa ki paidbah nongshong shnong bad ki khynnah skul ha ka leit ka wan ba hap ha ka dong Lad Iewsir.
Haba kren ha kane ka sngi, u Rangbah Shnong ka Saiden, u Bah E.K Lapang u la ong ba ka dorbar shnong ka la shim ïa kane ka sienjam ban shna ïa katei ka jingkieng ïaid kjat, ka dei hadien ba la bun snem mynta ka shnong ka ïohi ïa ka jingeh ki paidbah ha ka leit ka wan. Dei namar kane ka daw ka shnong ka la pynlut pisa ban shna na ka daw ban pynsuk ïa ki paidbah ha ka leit ka wan, u la ong.
U la ong ruh ha ki por ba la leit noh ki nongshong shnong ki shem jingeh ha ka leit ka wan ban ïaid lyngba ka jingkieng ba la shna tang da ki siej ban kam ïa katei ka wah Umpyrli, hynrei mynta hadien ba la dep shna da u nar rod bad u dewbilat kane ka jingkieng ka la skhem bad ka la pynsuk ïa ki paidbah ha ka leit ka wan.
Shuh shuh, u la bynrap ruh da kaba ong kumba ka Shnong ka la lah ban plie paidbah ïa kane ka jingkieng ïaid kjat, u khmih lynti ruh ba ki paidbah kin ïa snoh kti lang ban sumar ïa katei ka jingkieng khnang ba kane ka jingkieng kan neh slem bad ruh ba kan dang lah ban ai ka jingshakri na ka bynta ka pateng ban sa wan ki nongshong shnong.
