Shlei um bad twa ka surok Shillong – Dawki, kyntu ka SDO ïa ki kali ban ïaid husiar

Shillong, Ïaïong 04 : Ka jingther u lapbah ha kine ki khyndiat sngi ka la pynlong ïa ka khyndew kumjuh ïa ka surok Shillong – Dawki ban twa bun jaka nalor ka jingshlei um kaba la poi haduh u pud ba ka leit ka wan ka la shah ktah tyngeh hynne ka sngi.
Katkum ki video bad ki dur ba la phah da ki nongshong shnong na katei ka thaiñ la pyni ba ka jingtwa ka khyndew kadei kaba la kham jur bad ka la jan tap bad rong ïa kawei ka kali alto na surok.
Nalorkata, ki don ruh hapdeng surok kiba la shlei um bad kylla long kum ka thwei bah. Ki la don ruh bun ki kali kiba kylla long ki lanot ha katei ka jingjia bad shu sahkut ei hapdeng surok namar kim lah shuh ban ïaid na shilliang sha shilliang.
Ki don ruh ki bynta jong ka surok kaba dang siang thymmai kaba la twa ha katei ka jingjia.
Na kine baroh, kaba kham i shyrkhei eh kadei ka jingsahkut jong kawei ka kali hapdeng surok bah ha kaba ka um kaba tuid ruh kadei kaba khlaiñ. Ki paidbah kiba sahkut ha katei ka jaka ki la hap ban shu ïa snoh para ma ki tang ban ïoh kam sha jaka ba shngaiñ.
Halor kane ka jingjia, ka kyrwoh na ka sorkar ka ong ba ka la don ka jingdkut ka surok haneng Siatbakon ha kaba katei ka kali ka la sahkut.
Ka kyrwoh ka ong ruh ba ki samla pule kiba sahkut ha lynti ban leit thoh eksam ki la ïoh ia ka jingiarap na ki pulit ban poi sha ki jaka thoh eksam.
Namar ba ka eksam Matrik ka dang ïaid bad katei ka jaka kadei ka jaka pdeng ba ki samla pule ki hap ban ïaid man ka sngi ban leit thoh eksam, na ka liang ka REPSDO ka kyntu jur ïa ka sorkar ba lada jia ba don ki samla pule kiba duh ban wan thoh eksam tang na ka daw jong katei ka jingjia, kadei ban pyrkhat lem kyrpang na bynta jong ki.
Na ka liang u Mawphor haba ïa kren bad i SDO ka Pynursla Civil Sub-Division, Kong E Warjri i la ïathuh ba ka jingkhang ïa ki kali ban ïaid na katei ka surok kadei tang shipor namar ki dang pynbha ïa ki lynti ïaid. “Ngi dang shah tang ïa ki kali rit ban ïaid ryngkat ka jingkyntu ba ki dei ban husiar haba ki don ha lynti,” i la ong.
I SDO i la pyntip ruh ba watla katei ka jingjia ka la jur hynrei ym shym la don satia kano kano ka jingjia kaba sngewsih.