Shlei u paidbah ha ka jingïalang pynrung dkhot ka VPP ha Umsning

Umsning, Jylliew 17: Ka Voice of the People Party (VPP) ha ka sngi Saitjaiñ ka la pynlong ïa ka jingïalang pynrung dkhot sha ka party ha Umsning ha kaba la sakhi u paidbah byllien u la wan shim bynta sha kane ka jingïalang ka VPP bad ruh ban pynïasoh pura sha ka party.
Haba kren ha kane ka jingïalang u Bah Ardent u la khot la wer ïa ki paidbah ka them Ri-bhoi bad ki paidbah kylleng ka ri ban don bynta bad ka VPP na bynta ban saiñdur thymmai ïa ka long ka man ka jylla sha kaba kham bha ban ïa kaba ka long mynta.
“Ngi ïohi ka jinghiar ka ïoh ka kot, ka rep ka riang, ka pule puthi, ka koit ka khiah bad habaroh ki laing ka daw hi ka dei namar ki nongsynshar jong ngi kim pyndep hok la la kamram hynrei ki lapmiet ym shuh ban bamsap hynrei ban bamduh ïa ka bhah u paidbah bad ban rat dyngkhong ïa kane donkam ïa u paidbah ka ri bad ka jylla ban snoh kti lang bad ka VPP ha kane ka jingïakhun pyrshah ïa ka sorkar kaba lute ïa u paidbah,” ong u Bah Ardent.
Haba pynphai nia ïa ka jingkynnoh u MLA ka Umsning u Dr Celestine lyngdoh ba um ïohi eiei ïa ka jingtyrwa ne ka jingai jingmut ka VPP halor ka jingkwah ban pynkylla thymmai ïa ka rrservation Policy u Bah Ardent u la ong, “Nga shaiong ban ïohi ïa ka jingkren u MLA jong phi uba kat ka kyrdan jong u hana um tip kaeui kaba ngi dawa kum ka party halor ka Reservation Policy namar naduh ka sngi kaba nyngkong ka jingdawa jong ngi ka dei ban thaw da ka expert Committee ban ïathir ïatai ïa ka reservation Policy bad ngi la ai jingmut ba lada pynkylla ïa kane ka bhah thungkam ka dei ban pynshong nongrim kat kum ka jingdon paid, haba ngi la ai jingmut kumne sa kaei pat u kwah,” u la ong.
U la ong ruh ba ka jingdawa ka VPP ban pynkylla ïa ka reservation Policy ka dei beit ba ka bha ba dei hok jong ka jaidbynriew ka dei ban ïoh bad ïa ka hok jong kiwei ruh ka VPP kam treh ban knieh.
Haba kren halor ka jingkynnoh ba ka VPP ka ïalam bakla ba lada pynkylla ïa ka Reservation Policy baroh ki samla kin ïoh kam sorkar lut u Bah Ardent u la pynphai nia da kaba ong, “Ngim pat ju ong ba lada pynkylla ïa ka Reservation Policy kin mih bun ki kam ha ka jylla ban pynïoh kam lut ïa baroh hynrei ba ka hok ba ngi dei ban ïoh ym dei ban hun tang namar ki kam sorkar ki duna,” u la ong.
“Lada ngi don ha ka bor ki don bun ki lad ban kyntiew ïa ka ïoh ka kot bad ka lad aikam aijam ïa ki samla bad ki don ruh ki lad ban pynmih kam da ka jingkyrshan ka sorkar India bad kata donkam ban don ki polisi kiba biang bad ka VPP ka don hangne ban leh ïa kata ka bynta,” u la ong.