Jowai, Jymmang 13: Ka jingbteng jong u slap naduh hynnin ka sngi ka la wanrah ïa ka jingshlei jong ka Wah Myntdu kaba la tap lut ki pynthor kpa kiba don ha ki bynta ka pynthor neiñ bad pynthor wah, kane kala wanrah ruh ka jingtwa kyndew ha ki bynta surok kaba la ktah ïa ka leit ka wan jong ki kali ki mator.
La sakhi ba ka Wah Myntdu kala jur bha ka jingeh jong ka wah kaba ka kynjoh shaduh ki bynta jong ka surok bad ka jingtwa khyndew kala don ha ki bynta jong ka Mynthong, Salaroh, Riatsasim kaba la ktah kumjuh sha ki ïing briew, ka jingtwa kyndew kala don ha ka surok ba dang sep shu shna thymmai ban leit na Jowai sha Amlarem bad kiwei de ki bynta jong ka Ri-Lum Jaiñtia.
La shakhi ruh ba ha u surok National Highway-6 (NH) uba don ha Ummulong ula shah tap haka um kaba ka la bun jingeh ïa ki kali kiba ïaid na u surok bah. Kumjuh ruh ha Wahiajer bad ha Nartiang ka um kala poi haduh ar ne lai phut ha ki ïing briew, hynrei ym shem la don kano kano ka jingjia ba sngewsih.
