Nongpoh, Jymmang, 20: Na ka daw ka jingbteng jong u lapbah ban hap naduh hynnin ka miet bad haduh mynta ka step, ka shnong Umpher ha ka thaiñ Byrnihat ka la hap ban mad ïa ka jingshlei um haduh ba la shah ktah ka skul bad ki ing ki sem bad ka leit ka wan ba ka jingshlei um ka la tap lut ïa ki lynti ki synkien.
La sakhi ba na kane jingther u lapbah, ka St. Jude Higher Secondary School, Byrnihat,ka la hap ban ai shuti ïa ki khynnah skul, ba ka um ka la rung sha ki kamra klas bad sha ki phylla jong ka skul. Nalor kata, ki ing ki sem ruh ki la shah ktah jur ha kaba bun na ki longïing ki mad jingeh ba ka um ka pynjot ïa ki ing ki sem bad ki jingdon ki jingem.
Tang shu poi ka aiom slap, katei ka shnong ka ju shah ktah na por sha ka por na ka jingshlei um, ha kaba ka daw la kynnoh ba ka dei ka jingbym biang ka nala um jong ka surokbah National Highway-6 ha Ri Bhoi.
Kiba bun ki nongshong shnong ki la pynpaw ïa ka jingsngewkhia halor kane ka jingïakynduh jingeh na ka por sha ka por tang shu dei ka por slap bad halor kane la donkam ban thaw ïa ki lad ki lynti ban weng ïa katei ka jingeh.
Haba kren halor kane ka jingjynjar kitei ki shnong bad kynthup ruh katei ka skul pule, u MLA ka Jirang Constituency, u Bah Sosthenes Sohtun ha u snem ba la dep u la ai ka jingïarap bad ruh ban shim khia na ka bynta ban pynkhuid ïa katei ka Nala um kaba long ka daw ka jingshlei um tang shu jur slap bad mynta u snem ruh ki paidbah ki mad biang ïa kajuh ka jingeh na kane ka jingshlei um kaba dei na ka jingbym pynbha thikna ïa ka nala um.
