Shitrhem ka jingïaseng ïalap ka Synjuk ki Seng Rangbah Katholik Jowai Diocese ha Mynkre

Jowai, Nailur 12: Kumba ju long shisien shisnem ka jingïakynduh lang bad ka Jingïaseng ïalap ki dkhot ka Synjuk ki Seng Rangbah Katholik Jowai Diocese, ha kane ka jingïakynduh kaba 18th jong ka Synjuk kaba ar sngi kaba la sdang naduh ka sngi Saitjaiñ bad kut ha ka sngi U Blei (Sunday) la pynlong ha ka Balang shnong Mynkre jong ka Parish Lumshnong East Jaiñtia Hills District, kala long ka jingïakynduh bad ka Jingïaseng ïalap kaba myntoi, ha kaba ki Rangbah hapoh ka jingïalam jong u ma Mikhael Nongtdu, Adviser jong ka Synjuk, ki la ïatai sani bha ba kum ki Rangbah kaei kaba ki dei ban leh bad ban thaw ki lad ki lynti ban rat diengkhong ïa kiba bun ki jingsniew khamtam ïa u “Drok” bad kiwei de ki jingdih ba sniew kiba la ïoh phrung khlieh hapoh ka Rilum Jaiñtia.
Ha ka sngi U Trai (Sunday) ha ka por 10 baje mynstep la don ka jingkñia Mass Iukharist bakhuid, kaba la lamkhmat da u Rev. Fr. Martin Shylla Chancelor ka Diocese Jowai, ha kaba la synran da u Rev. Fr. Simeon Sungoh, Rev. Fr. Cresence Laloo, Procurator ka Diocese Jowai bad u Rev. Fr.M. Biam.
Ïa ka jingpynbna ïa ka Khubor babha (Gospel) la pynbna da u Rev. Fr. Cresence Laloo bad ïa ka sneng ka kraw, ka kyntu ka kynpham bad ïasam ïa ka ktien ka jong U Blei da u Rev. Fr. Martin Shylla. u Rev. Fr. Martin Shylla, haba kren ha kane ka sngi nalor kaba ïasam ïa ka ktien ka jong U Blei, u kyntu ruh ïa ki Rangbah, ïa ki longkmie bad ïa ki khun samla ban long ki Atiar ki ban rat diengkhong ïa kiba bun ki jingsniew kiba la ïoh phrungkhlieh hapoh u pud u sam jong ka Jowai Diocese.
Haba phai sha ki Rangbah, u Fr. Shylla u ong, ki Rangbah ki dei ki Paia, ki Rishot bakhlaiñ jong ka jaitbynriew bad ka Balang bad ki don ka kamram ka bakhia ban shim ïa ka jingkitkhlieh bad ban thaw ki lad ki lynti ban rat diengkhong ïa kiba bun ,ki jingsniew kiba la sdang jyllei hapoh ka Rilum Jaiñtia ( East bad West Jaiñtia Hills).
Nangta u ong ha shwa ban jam sha kane ka phang, ki Rangbah ki dei ban phrang ïalade ki Rangbah ba kat ki Rangbah dashisha naduh na ïing na sem, ha shnong ha thaw, hapoh ka Balang, ha ka imlang ka sahlang lymda kumta kane ka thong jong ki Rangbah ban rat diengkhong ïa ka jingsniew kam ym poi shano shano ruh haba ïalade ki long ki diengpynkiang ha ka Akor ka Burom ïa kiba dangkhie dangsan.
Shuh shuh u Fr. Martin Shylla,u ong ka Kyntien Rangbah ka thew ïa ki Rangbah kiba kit kiba bah ïa ka khia ka shon ka ïing ka sem, ïa ka kurim bad ïa ki khun ki kti bad ka jingshngaiñ ïa ki kynthei ki khynnah bad u pynkut ïa ka jingkren da kaba ong “ Ko Rangbah to ri ïala ka burom ka Akor bad to long ki Rangbah kiba kat ki Rangbah da shisha da ka jingim babha bad to long ka nuksa ka babha ba kiba dangkhie dangsan.