Shiteng na ki 38 lak ki nongshong shnong ha ka jylla ki dang dei kiba hapoh ka rta ba 20 snem: Conrad

Shillong, Nohprah 04: U Myntri Rangbah ka jylla u Conrad K Sangma ha ka sngi Palei u la pynpaw ïa ki jingïaleh bad ki lad ki lynti ka Meghalaya, da kaba kdew ba shiteng na ki 38 lak ngut ki nongshong shnong ka jylla ki dei kiba hapoh ka rta kaba 20 snem.
“Kane ka kynhun jong ki samla ki don lang ïa ki lad kiba bun bad kumjuh ruh ki jingïakhun kiba kongsan. Kim dei kiba lah wanrah jingkylla ïa ka jylla ne lada ki shah kyntait, kin long ka bor jingpynjot,” ong u Sangma ha ka prokram pynlait ïa ka Platinum Jubilee Souvenir jong ka St. Xavier’s Higher Secondary School, Tura kaba ha West Garo Hills district.
U la batai ba ka sorkar ka la pynleit jingmut ban pynwandur ïa ki samla lyngba ki jingkdew lynti, ki ai ïa ki lad ki lynti bad ki jingpule kiba long kiba kordor bad kiba shongdor.
Haba kren halor ka pule puthi, u la kubur ba ki don ki jingïakhun bad pynpaw ruh pat ba ki don ki rukom pyrkhat ban wanrah ki jingkylla. “Ngi pynlut palat T.3,500 klur manla ka snem halor ka pule puthi, hynrei ka jinglong ka pule puthi ka dang long kaba sngewkhia. Ka Meghalaya ka don malu mala kumba 55,000 ngut ki nonghikai bad lajan 15,000 tylli ki skul. Bun na ki shnong ki don bun ki skul bad tang khyndiat ngut ki khynnah skul. Ban pynkylla ïa kane ka jingtei ka long kaba kyllaiñ bad kan donkam ïa ka jingtreikam kaba long da ka bynta bynta sa kumba 15-20 ki snem, hynrei ka long pat kaba kongsan na ka bynta ki jingpynbha kiba don jingmut.”
U la banjur halor ka jingpynneh pynsah ïa ka kolshor: “Baroh ki khynnah skul, kiba haduh Class ba 4 ne 5, ki dei ban nang lang ïa ka ktien Khasi bad Garo. Kane ka long kaba donkam bha ban pynneh pynsah ïa ka jinghiar pateng ka kolshor haba ai ruh ka pule puthi kaba bha.”
U Myntri Rangbah u la ïaroh ïa ka Platinum Jubilee Souvenir Committee halor ki jingpyrshang jong ki ban lumthup ïa ki jingthoh bad ban shon, bad ïaroh ruh ïa ka pynbiang ïa ki jingthoh article bad ki dur. U la ïaroh ruh ïa ki khynnah skul ba ki la pyni ïa ki sap jong ki ha ka cultural prokram.
Haba kren halor ka kam ai mynsiem bad ka jingthmu, u la banjur halor ka jingdonkam ka kam shakri bad ka jingïaineh.
“Katba ngi dang phalang halor ka jingdap 75 snem ka St. Xavier’s Higher Secondary School, Tura, ka jingim jong ka Sister Camino, bad ka jingaiti met bad mynsiem jong ki sister bad ki nonghikai kiba la shakri hangne, ka la ai mynsiem ïa ngi ba ngin ithuh ïa ka jingthmu jong ka jingim jong ngi, ban ïaid shakhmat. Ka jingpyndap pura ïa ka jingim kam wan na kaba pynleit jingmut tang ha ka malade hynrei da kaba sumar ïa kito kiba don sawdong jong ngi.”
Haba ïaroh ïa ki kam babha kane ka skul, u Myntri Rangbah u la pynbna artylli ki jingnoh synniang kiba dei ka skul bus kaba thymmai bad ki tiar tem ka ban synniang napoh ka Chief Minister’s Special Development Fund.
U Bishop Andrew R. Marak ka Diocese Tura u la pynpaw ka jingai khublei ïa ki Sisters of the Missionaries of Christ Jesus halor ki jingshakri jong ki kaba la ïaid mynta la 75 tylli ki snem bad ki aiti ïa ki kam shakri jong ki bad pynshlur ruh ïa ki khynnah skul bad ki khynnah skul ba la rim ba kin bat ïa ki jingkordor jong ka skul. “Leh ïa kaei kaba ki la ïoh jinghikai na ka school, bad ban ïarap markylliang khnang ba ngin nang kiew nangkiew shalor,” u la ong.
Ka Sister Marline Pinto, MCJ, ka la pynpaw ïa ka jingïaid lynti jong ka skul, ka la pynkynmaw ïa ka snem ba ka Missionaries of Christ Jesus ka wan ha Tura ha u snem 1948 bad ka jingsdang jong ka skul tang ha kawei ka ïingtrep ne ïingphlang. Ka la pynpaw da ka jingwanrah ïa ka jinghikai English medium ha u snem 1958 sha ka jingsdang ha ka kam imlang sahlang bad ka pule puthi kaba kyrpang, bad ka jingplie ïa ka NIOS ban kyrshan ïa kiba la pep skul shiteng por.
Ka Madam B.R. Marak, Convener jong ka Souvenir Committee, ka la ong ba ka Platinum Jubilee Souvenir kum ka jingïaid lynti jong ka skul, da kaba kynmaw ïa ki jingjop, ki jingïaleh bad ki jingkynmaw ki ban ai mynsiem ïa ki pateng ban wan.
La ïoh ïa ka jingkren pdiang sngewbha na ka Sister Maria D’Silva, MCJ, Regional Directress, ha ka prokram ki la don ki jingpyni ïa ki kolshor ba kynthup ïa ki Pirate Dance, Wangala Dance, bad Ballet Dance ba la leh da ki khynnah skul nalor ka jingrwai Jubilee.